教你點自救
不少圈中藝人鍾情開舖做食肆生意，但遇上疫情爆發，「疫市」下生意暴跌，加上政府「抗疫辣招」禁止4人以上同枱食飯，令生意更加百上加斤。藝人可嵐、黃婉曼和「牛雜妹」李亦喬為食店均要諗計出招自救。
可嵐轉攻下午茶外賣
可嵐去年12月在紅磡開食店，原本做鄰近學校午飯生意，可惜「生不逢時」，撞正新冠肺炎爆發、學校停課，開業4個月蝕住做，最慘烈一日生意只得「幾百蚊」。面對投資6位數回本無期，她說：「做生意當係交學費，呢個時期每行都一樣，守得住就贏。」可嵐透露曾想過停業2周來減省開支，但最終「撤回」：「人手得3個，大家似家人，冇諗過減薪或裁員，真係一個都不能少，同員工商量對策，決定集中火力做午市、下午茶同外賣，呢個月生意額係有進步。」她又指最開心是短短日子已儲了一班熟客，支持其店撐落去。
牛雜妹一家做晒慳人工
「牛雜妹」李亦喬與家人在元朗經營17年的麵店正面臨前所未有的考驗，為應對每枱限坐四人的規管，她說：「舖頭全盛時可以坐滿11枱客，外面再加6、7張枱！依家多數時間『拍烏蠅』，少咗八、九成生意！」但辛苦中亦感到人情味，獲業主下調租金，而舖頭主要員工都是家人，加上食材來貨由爸爸親自去街市購買，故減省不少開支。她說：「一家人齊心合力，舖頭暫時都頂得住！」
黃婉曼開發抗疫飲品
黃婉曼開甜點麵包餐廳，疫情下生意銳減5成，於政府新措施後首天，餐廳生意只剩2成，因為顧客座位減半，生意額自然再減半。問到如何自救？她稱明白政府呼籲大家留在家中是為免人群感染，故她火速開發一些外賣餐單，當中有增強免疫力飲品與食品，並訂購新一批更多保護的外賣餐具及餐盒，同時會提供8折外賣自取優惠，及推出多款麵包，令客人可買回家享用，希望能在疫境守住餐廳。
來源 source: http://orientaldaily.on.cc
|
鍾意就快D Share啦！
|
|
|