「方法總比困難多！」坐在自己投資、位於尖沙嘴的食店卡位上，鄧一君若有所思後，慢慢吐出這句肺腑之言。
去年6月，香港爆發史無前例的社會活動，動盪歷時7個月後，正當香港人還未停定喘息，緊接在1月初，大陸爆發肺炎，引發本世紀全球最嚴重的疫症，衝擊無數行業。多年前已成功轉營做投資分析顧問的鄧一君，去年農曆新年膽粗粗學人做生意，投資50萬在油麻地開設一間只得「立食」的車仔麵店。未夠3個月，他決定再下一城，加大投資額到150萬，在尖沙嘴堪富利士道，以月租13萬再開一間有40個座位的食店，雄心勃勃希望在飲食市場分一杯羹。
結果短短年半時間，食店生意由盈轉虧，去年7月油麻地店舖率先結業，做訪問時只剩下這間尖沙嘴分店。鄧一君說：「其實舊年社運時，生意未算好差，執咗油麻地間舖，係想集中火力做呢間。開頭呢間舖都有盈利，但1月開始，生意插水式暴跌，入晒肉嗰隻，我諗少咗7成生意，近呢一、兩個月，每月都要倒貼十幾萬，如果再差落去，我哋唔排除會斬纜。」鄧一君所言非虛，尖沙嘴舖在4日前已關門大吉，成為藝人在疫市下的「第一滴血」。
兩間舖頭先後執笠，短短年半蝕足200萬，心血最終付諸流水，旁人為他肉赤，但鄧一君卻未太放在心上。「有時做生意唔一定講錢，因為你賺到啲經驗，可能幫到你之後做嘢，咪當交學費囉。」除了經驗，在這段時間，鄧一君亦賺到難能可貴的人情味。「呢年幾最開心都係同啲客相處嘅時間，只要個客入嚟食我哋嘅出品，讚我哋啲嘢好食，我就好有滿足感，有人食完臨走同我講句『一君加油呀！』咁就夠啦，嘻嘻！」
藝人做生意，有窩心難忘回憶亦有激心受氣之時，鄧一君亦不例外，回想第一次當老闆的經歷，他坦言最棘手的就是人事問題，他說：「其實你估唔到舖頭細細數埋得幾個人，點知都有咁多是非同衝突，記得舊年聖誕農曆新年時，有人問我『老細，紅日嗰幾日會點安排呀？』最初我唔係好明佢嘅意思，咁間店一係開一係唔開嘅啫，之後再諗，佢應該係想知有冇假放或者有冇特別津貼，咁我就問啲做飲食嘅朋友，佢哋話『梗係唔放啦，呢啲時間先搵錢！』咁我又問佢哋會唔會畀多啲人工呀，佢哋話『而家又唔係話好生意！』，咁我都覺得大家齊心捱過呢關先啦，就落咗正常返工嘅指示，點知有一個半個同事，私底下話『咁樣唔啱喎，應該咁咁咁！』周圍傳話我好刻薄，我就覺得點解你唔喺開會時表達想法，大家有商有量嘛，你咁樣傳咁樣講又幫唔到你，又幫唔到件事。」
而另一件令鄧一君更失望的事，發生在一個月前，他說：「有件事都想趁呢個機會分享，話說有個員工喺呢間舖頭做咗個幾月，佢最初好肯做好快上手，我亦好錫佢，點知突然有一日佢不辭而別，咁佢冇交低落，我哋梗係擔心啦，不過過咗幾日，心諗可能都係唔做啦，咁我哋經理搵佢簽番份文件交收制服同鎖匙。經理同佢講，按規矩你要有7日代通知金賠畀公司，但佢唔賠之餘，仲反咬話『唔係我唔做，係你哋炒我之嘛。』唔賠，我理解，但我堅持嘅原則，係你唔可以咁樣捩橫折曲囉，跟住佢就講：『嘩，如果係咁嘅話，再傾唔掂我惟有搵勞工處投訴』」
鄧一君苦笑說該名員工除了揚言要找勞工處，還表明要找《蘋果日報》投訴版，說時帶點威嚇意味：「你自己諗啦，你嘅名氣緊要啲，定係呢件事緊要呀！」對此，鄧一君有深刻體會：「公眾人物搞生意就係會遇到呢啲事，即係你在明佢在暗，佢會覺得咪同你玩囉，睇吓邊個蝕底？出面啲人成日話僱主刻薄員工，其實有好多嘢大家唔知，有時員工都會刻薄僱主㗎！」
第一次做生意，最終執笠蝕錢收場，鄧一君想法樂觀。「雖然疫情令我間舖執笠，但我立場依然覺得市民應該要留喺屋企，盡量唔好出街，大家唔出街唔聚餐，盡快等過咗個疫情先。咁我呢度做唔掂，遲啲等疫情過咗咪再搵個間做囉，我團火仲未熄㗎！」
撰文：勞燕萍
攝影：沈健程、葉君海
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|
