2020年4月4日星期六

直擊曼谷宵禁第一晚胡慧冲：條街靜到有啲淒涼

搭正晚上十點開始宵禁啦。

為減低新冠肺炎疫情，昨日係泰國進入緊急狀態令第9天，亦係曼谷第一晚宵禁，居泰港人胡慧冲(Roger)分別喺屋企騎樓，屋苑大門口直擊晚上十時後宵禁的狀況。他形容，條街真係靜到有啲淒涼感覺，但他希望今次大家可以唔出街，齊心嚟抗疫，若然大家唔聽話「攬炒」，確診數字愈嚟愈多嘅話，泰國政府有可能進一步實施24小時宵禁，咁到時就冇得外出拍片了。

宵禁令由每晚十點至凌晨四點，所見首晚宵禁中嘅曼谷市面水靜河飛，成條大街冇車又冇人，只見警車巡邏，Roger說：「泰國呢度好耐冇試過宵禁，十年前經歷過紅衫軍，相對今次宵禁，氣氛其實唔緊張，同埋喺宵禁前，商場、店鋪、按摩店、酒吧、娛樂場所等全關門，大家冇得去蒲，早已適應咗市面嘅寧靜。」

他又搞鬼打上煲呔換上禮服，喺宵禁前嘆法國晚餐！其實只係自我感覺良好，叫咗法國菜外賣回家，幻想去咗法國餐廳食大餐：「外賣都好味㗎，$300幾蚊港幣已柯打到黑松露湯、法國田螺撻、法式田雞腿、炸薯條、寬條麵，仲配埋汽水。」同時，他又將食外賣相拼貼落日本旅行舊相，笑言要開開心心帶出正能量：「宵禁又唔係失禁，唔係世界末日，唔好太傷感，應該喺疫情中互相扶持，𠵱家泰國佛廟免費派發口罩及飯餐畀失業人士，發揮互助精神。」