(Getty Images)
巴塞隆拿智利中場維達爾同球會嘅合約下年就會約滿，西班牙傳媒報道，佢收到一間英超球會嘅邀請，仲同佢傾咗未來發展藍圖，內容極為吸引，呢間唔係盛傳多年嘅曼聯，而係被沙特王儲收購咗紐卡素。
維達爾已經32歲，但勝在大賽經驗豐富，效力意甲祖雲達斯、德甲拜仁慕尼黑、西甲巴塞隆拿都贏得聯賽冠軍，最犀利係佢由2011/12年球季至上季，已連續8季有聯賽冠軍落袋，有佢在陣當然可以幫助重建球會，所以曼聯同國際米蘭對佢都好有興趣。
據報，維達爾對轉投紐卡素有一定興趣，知道班主會大搞之餘，自己亦有機會喺陣中做大佬。不過，首要條件係紐卡素要炒咗現任領隊布魯士，成功聘請前祖雲達斯教練阿里基，佢先會答應，因兩人喺祖記合作得好愉快。
其實現任國際米蘭教練干地曾經喺祖記同維達爾合作過3年，所以國米亦希望打主帥牌搶維達爾，但因為維達爾未踢過英超，對佢吸引力更大，只要紐卡素真係搵到阿里基教，絕對可以成功撬走維達爾，曼聯只可以望門輕嘆。
來源 source: http://hk.on.cc
|
鍾意就快D Share啦！
|
|
|
