真係恭喜你哋呀！
藝人陳明恩日前在社交網宣布與無綫合約完結，正當大家以為她會先休息一陣再出發後，原來她另有喜訊要宣布。她在社交網上載一張與丈夫Eddy的合照，手上拿着一件BB衫報喜，她表示：「好感恩今年神送咗一個好大嘅禮物畀我哋。我哋會好努力學習點樣培養呢個小朋友成為祝福別人嘅人。」
陳明恩精神飽滿現身電台訪問，透露重了3KG，她說：「懷孕初期好攰，成日瞓，都有少少想嘔。」她說結婚3年，BB是計劃內，因之前成日病，去年開始中醫調理身體養生，補足一年，終於一擊即中，問到佗仔定女？她說：「未知，我哋仔女都鍾意。（混血兒好靚？）希望靚，我哥個太太係日本人，佢兩個小朋友都好靚好得意，不過自己想要個仔先！（想生兩個？）係！我有個哥哥，覺得哥哥可照顧弟妹。」她透露今年2月與TVB完約，離開工作了13年的地方，當時透露會嘗試不同演藝工作，原來還包括生仔？她說：「依家排緊高世章嘅音樂劇，9月演出，演出時我大約7個月身孕，開始辛苦啲，做完音樂劇準備生，休息完下年4月同管弦樂團合作做一個合家歡嘅騷，都係唱歌，Timing啱啱好。（你安排好晒？）音樂劇對我嚟講相對舒服啲，如果拍劇有時通宵，音樂劇一般日頭排，安全舒服啲。我會諗大住肚唱會點呢？肚會唔會跟住音樂郁呢？」
而預產期在12月，就像聖誕禮物一樣，不過因為父母早前返澳洲探親，後來疫情爆發至今，交通尚未開通，故未能返港。她說：「香港醫療好好，想喺香港生，安心啲，我計劃想自然分娩，媽咪爹哋未返到嚟都好緊張，我都需要媽咪幫手。」她說看到正在熱播她有份參演的《飛虎之雷霆極戰》，醒起在倫敦拍劇的開心回憶：「飛虎係我喺TVB最後一部劇，會有唔捨得，經歷好多，識咗好多好叻朋友，導演監製幫我好多，本身劇場出身，但拍電視好多嘢唔識。」另外她又剛為一本英文教育書裏面的英文歌填詞，名為《Yes, I can》，實行向填詞人方向發展，笑言只限填英文。
來源 source: http://hk.on.cc
|
鍾意就快D Share啦！
|
|
|
