「攞咗獎之後，有一日開工，有個訓練班嘅師弟同我講，覺得好羨慕我，駱應鈞話你要佢嘅成就係OK，但係唔好要佢嘅經歷，因為係好驚濤駭浪，唔係人人都受得住！」正如好友所言，現年52歲前大台藝人麥長青（麥包）的人生確實比過山車還要轉多幾圈。麥包入行超過30年，參與過的電影、劇集和綜藝節目，保守估計接近100部，不過演藝事業發展不似預期，試過因簽一年一騷而長期零收入，為了謀生，他更曾經身兼數職，成立公司幫商場做宣傳及策劃的工作，殊不知創業作東京銀座廣場和水族廣場淪為死場，最近因為老婆在2014年疑墮入炒賣iPhone騙局，早前入稟索償百萬及向法庭申請禁制令阻滋擾，結果事件一度成為城中熱話。
麥包日前在觀塘接受《蘋果》專訪，當日疑墮入炒賣iPhone騙局一案仍在審理中，麥包表示詳情暫時不能透露太多，對於自爆一星期只得500元零用，他說：「嗰陣係講緊我喺一個經濟唔係咁好嘅時候，加上本身係一個唔識得理財嘅人，係由太太去管理，以前太太會畀零用錢我，如果佢畀500蚊我 就要畀心機搵錢，畀1000蚊就即係可以懶啲啲，而做騷得封利是，公司當簡單節目，唔係正式活動，所以只係畀封利是，當時問起咁講。」他又說：「我從來冇鬧過舊公司，簽約知人工係幾多，冇人逼你簽，一簽就接受，係心甘情願嘅事。因為我係好鍾意做戲，有機會演好角色，亦希望有一日會紅，自然搵到收入，不過自從拍完《茶是故鄉濃》，我已經冇咗呢個諗法，嗰陣我見個個都紅晒，係咪輪到我？但係發生咗一個故事，所以冇咗呢個諗法！」追問箇中詳情，麥包只肯說：「係俾人打咗毒針，詳情唔講，可能係前世欠咗佢，希望下世唔好再遇到佢！而家嘅生活係拮据啲，但係我知道上天係畀緊機會我去學習，經過每一次嘅考驗，上天就會畀啲嘢我。」
正所謂「輸人唔輸陣」，就算人生不似預期，仍然繼續生活，他淡然地說：「人生際遇係控制唔到，生意上嘅嘢，好嘅，我唔會打鑼打鼓咁周圍講，如果係失敗咗，有人出嚟講就自然會知。好多人成日講個商場，我搞嗰陣係成功喎，而家失敗就賴我，唔關我事喎，我走咗好耐，我嘅身份係一個策劃。」他續說：「用嗰個商場做例子，我只係一個花王，你畀盆花我，我係負責施肥、淋水、曬太陽，種靚盆花，之後就交番畀你，往後你唔再打理，唔再施肥同曬太陽，其實唔關我事。但係有啲人就會話：『麥包，你種死咗盆花喎！』盆花唔係我種死，但係我冇得去爭辯呢樣嘢，我亦唔會去爭辯，知嘅就知，唔知就永遠都唔知，唔知只係行外睇報紙嘅人，知嘅咪繼續搵你囉。」
回顧過往的人生路，麥包不諱言「得係多過失」，他說：「喺10年前試過有人用6位數字買我嘅proposal，拍戲嘅機會，因為我根本唔夠天時地利人和，我係一個孤身作戰嘅人，喺呢行冇任何嘢，有人畀機會我已經好感恩，TVB有咁多藝員喺度，起碼我都叫做做過啲重角，做過好多角色，真係好感恩。我成日都講，好多叻過我、勤力過我同好過我嘅演員，佢哋都冇呢份幸運，咁你覺得我係好彩定唔好彩，幸運定唔幸運？我覺得自己係比上不足，比下有餘嘅人，仲有乜嘢好呻？我唔係先天性有呢啲嘢嘅人，每個人嘅人生際遇都唔同，我係屋邨仔出身，本身係乜都冇，而家起碼叫做對自己有交代，冇虧欠同待薄過自己任何嘢，所有嘢都盡咗自己最大嘅努力，所以唔可以有呻同怨，我係存感恩嘅心，其他係控制唔到。」
坎坷過後有艇搭，麥包在2010年憑《巾幗梟雄之義海豪情》中飾演走狗「梁非凡」，在台慶頒獎禮奪得最佳男配角：「其實喺攞獎之前我已經想走，嗰陣冇乜戲演，試過係得幾場戲，想轉一轉行，最記得嗰陣搵過陳妙瑛，問有冇嘢畀我做，佢話唔理我喺TVB有幾多錢人工，總之用3倍人工叫我去幫佢手，佢真係好有義氣嘅朋友。不過之後攞咗獎，我又留番喺度繼續做。」剎那光輝過後，麥包又繼續過半浮沉的星途，「有一日開工，有個訓練班嘅師弟同我講，覺得好羨慕我。應鈞話你要佢嘅成就係OK，但係唔好要佢嘅經歷，因為係好驚濤駭浪，唔係人人都受得住，所以我真係好鍾意一句說話，彩虹因七色而美麗，人生因高低起跌而精采。」人生有否覺得遺憾？麥包說：「我諗就算你幾成功，幾叻嘅人都會有遺憾，上天係好公平，曾經有個人同我講：『阿包，其實我係羨慕你，有老婆仔女，但係我係乜都冇。』不過我話你有好多錢喎，所以上天咪好公平囉！要睇吓你係追求啲乜嘢，每個人都追求唔同嘅嘢，個天畀咗啲乜嘢你，你得到啲乜嘢，我成日都話唔同人比，只係希望自己一日比一日好，永遠喺自己角度去埋怨，係唔會開心，會屈咗喺掘頭巷入面，但係當你識得睇個世界，拉闊自己眼光，會開心好多。你諗吓我經歷咗咁多嘢，今日仲可以坐喺度同你做訪問，你就知我幾勁！」
最近麥包與ViuTv合作做真人騷《中佬唔易做》，不過今次並不是帶師奶去旅行，而是以大叔身份嘗試做演員以外的工作，麥包今次體驗揸貨van送貨，現實生活中，麥包坦言在摸索中：「好多嘢諗緊，娛樂圈轉咗，香港係冇戲拍，但係多咗啲網絡嘢，做清談節目，睇吓反應。本來諗住做飲食節目，買齊晒架生，不過因為疫情停咗，等疫情好番，試吓做KOL，仲有少少人氣尾水，咪試吓。」
撰文：唐琛悠
攝影：仇志德、廖達燊
來源 source: http://hk.appledaily.com
|
鍾意就快D Share啦！
|
|
|
