2020年5月16日星期六

【疫境勁多Job】網友睇到拳頭硬　肥仔美顏變姜濤 #姜濤

【疫境勁多Job】網友睇到拳頭硬　肥仔美顏變姜濤

姜濤（右）與肥仔仔合作拍廣告，今次Sell美容產品。

新冠肺炎肆虐下，一眾藝人紛紛大嗌冇嘢撈、收入驟減！不過，21歲人氣小鮮肉姜濤（姜B）近日不單止推出新歌《蒙著嘴說愛你》，仲頻頻孖住ERROR成員肥仔（梁業）拍廣告！繼早前「肥姜」聯乘鄭裕玲（Do姐）賣消毒液後，昨日二人又於社交網貼出新廣告Sell美容產品，片中，戴上假髮的肥仔敷住面膜用美顏神器在面上係咁碌，瞇晒眼、O晒嘴的他一臉享受，殊不知鏡頭一轉，肥仔一抬高頭即秒變姜B，仲派心心𠻹！姜B都搞笑留言：「有沒有想過……其實@fatboyip是我的分身？沒有啦，只是他有天得到高人指點，獲得修身美顏秘笈，將自己完美改造成我的樣子……」結果，有網友打趣道：「突然覺得你同肥仔都幾似樣」，又有人搞笑向肥仔留言：「睇到好想打你」、「用完身形都可以瘦埋，買買買呀」，相當爆笑！