公開卡片親自覆客
曾是大台配角，出過噴血寫真，被高登仔封為女神的樂瞳，最近搖身一變做老闆，在疫市創業賣洋酒，好夠膽量。將積蓄押上這舖創業作，樂瞳瞓身去到盡，將自己卡片掟上網，講明親自接單覆客作招徠。
本刊試打她公開的卡片電話，測試是否樂瞳本人回覆，雖然只限whatsapp留言落單，並拒絕用錄音回覆客人，但事後本刊問番樂瞳訂單內容，她即講出我們的訂單對話細節，確實親自覆客無欺場，
而且好有耐性向客人推介每樣貨品，顧客之道達標。
- 幾年前對洋酒有興趣的她，走到意大利酒莊一趟，之後又通過品酒師試，準備考牌，早為洋酒生意舖路。
- 疫市創業，瞓身做的樂瞳，掟將卡片上網，講明親自覆客，即引來好多男粉絲落order。
- 樂瞳卡片電話，只限whatsapp留言訂貨。本刊以客人身份留言，再事後問返樂瞳，她即能講出對話內容，果然親自回覆客人。
做埋送貨妹吸客
開業第二週，她還親自送貨，呢條橋簡直吸引一班醉翁之意不在酒的忠粉，而且清一色男班，買酒見偶像，好過畀折扣優惠。結果開業唔夠一個月，樂瞳靠食腦疫市突圍。樂瞳送貨當日，本刊跟隨直擊。自言小本經營，她暫租用朋友葵涌工廈的寫字樓做貨倉，故地方不便入鏡，唯有在工廈樓下等她出發送貨。慳得就慳，更找來前新城DJ林柏浠(William)仗義幫忙做司機。
- 幫手搬貨，純綷體驗吓！有壯男同事又有拍檔，呢啲粗重工夫，幾時輪到佢做。不過小本經營，樂瞳話由拍片推介、設計包裝、試酒、入貨等，都係佢一腳踢。
- 由拍劇到出性感寫真，儲落唔少男粉絲，故她一搞洋酒生意，班粉絲即力撐幫襯。
酒翁之意見女神
拉著有兩箱酒的手推車，樂瞳說:「好開心，好緊張。唔知佢哋見我有咩反應，可能好冷淡，哈哈！」樂瞳再一次力證親自覆客:「成日有客人喺whatsapp問我係咪樂瞳，講咗好多次，真係我。好似今日咁遲咗少少到，係因為今早我接到張新單，客人來自馬來西亞，我一路覆客，一路化妝，所以搞到遲咗出門。」
樂瞳第一站送貨到土瓜灣，在車上她致電通知客人，約在 15分鐘後到達。雖然親自送貨行動，只是開業宣傳攻勢，但她亦相當認真對待。
不過送貨的她，是「路痴」一名，下車後完全失方向:「究竟點行，唔識路！」，最後由義務司機林柏浠帶路。「好似去嗰啲網上dating，約網友見面嘅感覺，好緊張呀！」話口未完，樂瞳遠處已見到這位忠粉男客，站在寓所樓下等候女神送貨，她急步趨前:「Hello，多謝你呀，非常多謝你呀！」做生意，粉絲變成米飯班主，幫襯她一支白酒已經出動鞠躬致謝。
- 親自覆客未夠，還做埋送貨，對於醉翁之意不在買酒的男粉而言，幫襯一支酒就可以由偶像送貨見面兼合照，抵
有鮮肉市場
暖男粉絲出錢支持，仲化身「送水輝」，一手接女神貨，一手向她遞準備好的冰凍飲料:「飲啖水先！」，天時暑熱送貨，爆汗樂瞳十級感動:「竟然為我預備支水，好sweet好窩心一件事，喺呢刻係咪要飲一啖！」隨即開封，「呢啖水真係特別甜，俾心心。」跟手向男粉說:「試咗支酒，啱飲的話記得再幫襯。」每個男粉絲，相信醉翁之意不在買酒同女神見面兼合照留念，已經達到目的，冧死。當日連跑六站，其中土瓜灣的「送水輝」，到新蒲崗另一男粉Sunny，都是鮮肉客仔，樂瞳並不感希奇:「你地覺得我吸引嘅粉絲對象，年齡會比較大嘅咩？」33歲，仍有鮮肉市場。
試酒、包裝一腳踢
咪睇樂瞳嬌嫡嫡，其實幾捱得，當年拍大台劇，硬吞幾籠存放了超過一星期的過期道具饅頭，都可以頂硬上。現在創業，小本經營要一腳踢，辛苦程度不比捱更抵夜的幕前工作少。「雖然有拍檔及幾個同事，但我自己管好多範疇，公司ig同facebook，定期拍片介紹啲酒，甚至前期工作，如設計logo同包裝、用咩包裝紙、試酒、入貨、定價，所有嘢都係自己落手落腳。開業頭個星期，好多朋友支持，但自從我將自己卡片放上網，就有大量不同國藉嘅粉絲主動購買，都算係一個好開始。」
- 樂瞳:「雖然同拍戲唔同，做生意日忙夜忙，覆客覆到凌晨時分，但過程我卻好享受。」
拒酒客閒聊
疫市創業，求出路，也是一種冒險。「都會擔心生意額，例如成日諗辦法，點樣可以擴闊客源，或者代理更多產品，姑勿論生意最後係咪成功，但見到咁多人留意我，繼續支持我，已經係一個好大嘅鼓勵。」
親自覆客，有冇遇過古怪要求，她說會謝絕訂酒以外的閒聊！「有啲人會問好多唔關事嘅問題，例如話好鍾意睇你演戲，或說支持咗我好耐，問我會唔會再拍戲？我會話唔好意思，呢個真係工作上嘅電話，如果需要買酒嘅話，先至搵我啦。」
曾跟徐子珊互片
33歲的樂瞳，原名龔茜彤，model出身，07年入大台由閒角做起，直至11年憑劇集《點解阿Sir係阿Sir》演反叛學生，網民勁buy，更封她為高登女神。大台未有《星夢》前，愛唱歌的她， 曾圓夢出唱片，09年以樂壇新人，跟徐子珊在頒獎禮拗手瓜，在商台的「叱咤樂壇頒獎禮」角逐生力軍，她得銅獎，徐子珊則是銀獎。
- 11年她在劇集《點解阿Sir係阿Sir》演反叛學生，網民勁buy，一臉童顏的她被為高登女神。
- 09年樂瞳曾經出過唱片，更跟同年做樂壇新人的徐子珊拗手瓜，在商台頒獎禮，她在新力軍獎得銅獎，徐子珊獲銀，金獎得主是余翠芝。
食過期道具饅頭萌去意
由閒角做到女配， 17年因在大台劇《平安谷》遇上不人道對待，令她決心不再續約。離巢後曾在訪問中說:「一場戲要我吞六、七個饅頭，但嗰啲係存放咗超過一星期嘅道具饅頭，又唔知點解要攞嚟再拍攝用，可能有人揸過咬過，為拍攝我都攞起嚟食，一嗌cut我即刻吐返出來。」脫離大台後，自由身的樂瞳在其他電視台主持節目，現在幕前生意兩兼，辛苦但享受:「雖然同拍戲唔同，做生意日忙夜忙，覆客覆到凌晨時分，但過程我卻好享受。」
- 17年因拍大台劇《平安谷》遇上不人道對待，硬食過期至少一星期的道具饅頭，加上角色無發揮，種種際遇令她萌去意，不跟大台續約。
----------------------------
全新「和你撐計劃」 專享獨家禮遇 實際行動支持
按此了解更多
----------------------------
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|
