劉少君與麥德羅早前確診新冠肺炎，現已康復出院。
早前確診新冠肺炎嘅藝人麥德羅與劉少君，住院十多日先後康復，現已出院。二人今早相約去酒樓飲茶「慶祝」，並拍片與網民分享，片中見兩人精神狀態甚佳，劉少君以過來人分享感受：「雖然疫情嚴峻，就算老人家得到呢個病症，唔緊要一定醫得到，一定有希望，唔好氣餒，注重衞生。」而麥德羅則提醒大家飯後謹記戴口罩，勤洗手。承諾與麥德羅操得比以前更弗嘅劉少君，出院第2日已經落街慢跑，凌晨5點半已出發往。佢表示因肺功能受損，需多呼吸鍛煉，叮囑大家多做運動，保重身體。不過網民對於二人好番即約歎茶的行為，大感不滿，鬧爆二人自私，留言「有冇搞錯，為己為人應該在家休息啦，有冇腦㗎！」、「咁快走出來播毒」等。
提到遭網民喪插，麥德羅回覆東網說：「我哋互相慰問，同病相憐，一齊中招，我哋健康茶敍，合法二人喝，冇問題。」他又激氣地表示：「我哋有抗體已好番，唔會播毒，唔通全港好番人都在播毒？請大家評評理。」他強調又唔會日日跟劉少君見面，他都會好好休息，他覺得世界已變：「唔好理人咁多，做自己鍾意做嘅嘢，最緊要唔好最影響別人。」
劉少君也回覆：「凡事要真正了解一切才可亂猜的！我同麥德羅已經正式有抗體在身上，絕對排除感染給其他人，請大家明白！今天我倆碰面是積極研究如何將心肺功能盡快回復得好啲， 仲希望能夠有個良好嘅恢復公式，能畀所有受害者痊愈嘅人，兩人碰面的，希望大家能了解明解，不便之處請多原諒！」
呼吸系統專科醫生陳嘉榮，接受東網訪問時表示：「確診者出院前最少會有兩次測試，呈陰性先可以出院。（會有機會再受感染？）咁要再Check吓佢本身有冇抗體，如果有的話再感染機會係低，不過唔係100%，因為會可能有變種情況。」
至於剛出院便出街是否恰當？陳醫生說：「根據衞生署指引係需要在家休息一至兩星期，但唔需要同家人隔離。（外出飲茶OK？）咁佢個都曾經係患者，得兩個人。（會傳染畀其他人。）如果佢兩個都係康復者，傳染他人情況都係低。不過剛出院最好在家休息。（可以外出跑步？）簡單運動係可以，例如緩步跑、跳繩等，但要循序漸進。如果患者情況嚴重，如有肺炎咁就要休息吓。
來源 source: http://hk.on.cc
|
鍾意就快D Share啦！
|
|
|
