2020年8月28日星期五

被隊友Stanley寸偶像包袱重　姜濤家中戴口罩同帽開Live唱歌仔 #姜濤

被隊友Stanley寸偶像包袱重　姜濤家中戴口罩同帽開Live唱歌仔

姜濤晚上於IG直播做Music Live，其間Stanley亂入。

MIRROR成員姜濤和邱士縉（Stanley）上月飛抵台灣拍偶像劇，因為要半年後先同香港嘅「鏡粉（MIRROR歌迷專稱）」見面，所以兩人都好識做，頻頻於社交網出Po、開Live慰藉一班粉絲，昨晚姜濤就喺IG直播做Music Live，與友人即興彈結他、唱歌仔，事後他都節錄咗其中兩段同網民分享，包括演唱隊友Anson Kong（江𤒹生）的新歌《蝸牛》及張敬軒的《斷點》，一眾鏡粉紛紛留言讚好聽，有人仲表示聽到「耳朵懷孕了」。

不過最好笑，是一開波見到貪靚的姜濤遮晒面上鏡，片中一身家居服、似是斟完水路過的Stanley笑謂：「嘩！喺屋企戴口罩，Oh my god！嘩！戴晒帽咁樣，偶包（指偶像包袱）重到呢！」語畢姜濤笑咗兩聲，然後唞咗啖大氣就叫伴奏嘅朋友仔練彈一吓，當Set好鏡頭準備開金口之際，姜濤望一望側邊忽然爆笑，鏡頭一轉，原來Stanley為配合姜濤的「偶像Look」，搞笑地戴上黑超、Cap帽，並拎住杯水坐喺旁邊笑道：「得你有偶包呀，我冇咩而家？！」場面爆笑！