2020年10月20日星期二

【頭條獨家】疫情緩和後首個實體音樂會糖兄妹十年經歷迷失及無奈

轉眼出道十周年，糖兄妹十年間經歷迷失及無奈。

糖兄妹轉眼出道十周年，除了推出EP《Sugar Box》外，他們更會在10月24日於海洋公園怡慶坊舉行《糖兄妹預見十年音樂會》，係疫情緩和後第一個實體音樂會，糖兄妹多年嚟冇合體，故糖妹既興奮又期待。雖然疫情反覆，但糖兄話香港人防疫意識做得唔錯，應該ok嘅。如果反應好，仲想開多一場。採訪：方騫平

糖兄妹出道十周年搞作多多，除合體開Show外仲會出埋EP《Sugar Box》，之後睇啱時間先合體，貴精不貴多。

EP《Sugar Box》相當有心思，一見到即刻諗起電影《再見螢火蟲》，而罐內有3吋細碟，及於日本拍攝的相片外，仲有紙巾信物及用嚟換領今次音樂會嘅車票。

糖兄妹一直好希望開到實體演唱會嚟紀念出道十周年，同歌迷嚟一個集體回憶。可惜受疫情影響，計劃一拖再拖，點知突然有個快期，兩人就捉緊機會。糖妹話平日訓練有素，隨時可以上台演出；糖兄反而有啲擔心及緊張，因為好耐冇喺現場彈，不過好快會Pick up返。

糖妹曾經無晒信心

糖兄妹異口同聲話時間過得好快，亦見證住同期歌手王灝兒(JW)、林奕匡、吳若希、連詩雅及CAllstar等成長，糖妹說：「太開心，我哋仲做到鍾意做嘅嘢，咬住自己夢想開到飯。」提到十年間辛酸史，發展得算係順風順水嘅糖妹都話有迷失過㗎：「有段日子同糖兄分開發展，大家焦點落喺我電視主持及演戲方面，嗰刻感覺冇晒信心，大家係咪唔再聽我唱歌呢？有少少無奈，但都要生活。」至於糖兄就話兩人分開時間都幾長，曾有啲混亂，懷疑仲算唔算係組合？但只要搵到定位就冇問題，反而成日俾人大大聲話『佢係一個星嚟㗎？』有啲難頂，不過，有咁多年經歷，仲有乜好介意呢？呢十年嚟我哋反而學到識得溝通，會互相忍讓。」糖妹好開心話：「不枉十年嚟嘅相處，呢刻我哋嘅成熟程度識得排解問題，仲成為默契更加好嘅組合。」