無綫啲劇集橋段，成日畀網民話疑似抄襲，好似馬貫東之前喺《那些我愛過的人》嘅角色，就畀網民話疑似抄襲外國劇集《Good Doctor》。跟住套重頭劇《殺手》，今年六月首播嘅時候，網民睇過之後，又話個故事同小說《殺手世界》好似，之但係《殺》劇監製陳維冠就話冇睇過小說喎。
最近，高海寧同黎諾懿套《C9特工》，又出現疑似抄襲嘅爭議。有網民發現，黎諾懿喺劇中飾演嘅特工B3，激似《殺手》入面嘅陳豪。除咗角色設定一樣係咖啡室老闆，佢兩個每次殺人嘅招牌技倆都係一樣，例如chok爆開雙槍殺人，就連暗殺人開狙擊槍嘅嗰一刻，無論表情加埋動作都好似倒模一樣。
有網民仲話睇《C9特工》時，以為睇緊《殺手》，真係好亂呀！究竟係事有湊巧，抑或係無綫編劇組抄自己人呢？東姑翻查資料發現，《C9特工》係一八年六月開鏡，而《殺手》就係同年八月先開鏡。就咁推論，點都係黎諾懿chok爆開雙槍殺人在先喎。其實，邊個執人口水尾都冇所謂學無綫話齋：「本故事純屬虛構，如有雷同實屬巧合。」
黎諾懿開狙擊槍嘅時候，表情同動作，連支槍都同陳豪倒模一樣，觀眾大叫睇到好亂。
事有湊巧，喺《殺手》入面，陳豪扮演嘅殺手Zero，又係用咖啡室老闆嚟掩飾身份。
喺《C9特工》中，黎諾懿用咖啡室老闆嚟掩飾自己嘅特工身份。
陳豪之前喺《殺手》開雙槍嘅造型chok爆，令觀眾印象深刻，難怪黎諾懿畀人話抄襲嘞。
來源 source: http://eastweek.my-magazine.me
|
鍾意就快D Share啦！
|
|
|
