無綫視帝鄭嘉穎個老婆陳凱琳（Grace）離開咗電視圈後，除咗全力照顧兩位寶貝仔外，仲轉型做KOL，一得閒就拍片擺上網分享生活軼事。日前佢教煮即食麵，雖然佢嗰包麵好多超市都有得買，不過呢條片就成為網民熱話，點解呢？咪因為佢個煲夠貼地囉，仲被發現佢有節儉嘅美德添。
先講吓Grace個廚房，又大又靚，餐具、各款煮食爐應有盡有，睇樣應該係全部都係名廠，不過佢教大家用嚟煮麵嘅煲，就有啲同佢個靚靚廚房好唔襯，因為個煲又殘又舊，啲色仲好似經歷煮燶嘢嘅洗禮，成個煲身黑過包青天咁款，見到都唔係好開胃喎。啲網友就好驚訝，呢個舊到要掉嘅煲，竟然會出現喺Grace個廚房度，有人留言提佢係時候換煲啦。而Grace都從善如流，話拍完呢條片，已經同個舊煲講永別，唔知呢條片出街後，會唔會有廚具商送上門話要贊助佢全屋新煲呢?
本文作轉載及備份之用 來源 source: http://hk.on.cc
|
鍾意就快D Share啦！
|
|
|
