杜大偉曾與林峯楊怡組「九男女」獲力捧 暴肥冇Job遭古明華訓斥
人稱「David哥哥」的45歲杜大偉，效力TVB 25年間歷盡高低，近日接受TVB娛樂新聞台《星光路上》主持人潘盈慧訪問，分享了入行多年辛酸。1997年加入藝員訓練班的杜大偉，原來起初一心打算做幕後，惟報讀電視台平面設計訓練班競爭太大，才誤打誤撞轉讀藝訓班，結果受導師黃霑、羅冠蘭、詹瑞文等薰陶，對演戲愈來愈感興趣。
2001年，杜大偉與林峯、黃宗澤、楊怡及葉璇等，組成「九男女」獲公司力捧，隨即夥拍當紅花旦陳妙瑛、向海嵐拍攝經典劇《無頭東宮》，亦因此跟陳妙瑛結緣成為好友。提到自《無頭東宮》後棄影從商的陳妙瑛，杜大偉大爆對方其實心郁郁想復出：「之前叫佢嚟《愛．回家之開心速遞》客串兩、三集，佢有少少心郁嘅，佢私下同我講過有啲監製都曾經想佢出嚟玩吓，佢都心大心細……」無奈次次洽談合作都不了了之。
此外，在兒童組打滾了13年的杜大偉，後來因做到「滑啞」決定跳出Comfort zone，惜一直養尊處優導致身形暴脹，令重返劇組的他遲遲未獲演出機會，好友古明華（古佬）也睇唔過眼，杜大偉憶述謂：「佢問我想點呢？呢個身形想搵你做猥瑣佬或者阿叔（角色），但個樣又未去到麻甩佬咁；想搵你做靚仔，但個身形又唔係！」結果「唔嗲唔吊」的杜大偉終於扚起心肝減肥，找回定位，一步一步重獲監製賞識，除了於劇集《心理追兇 Mind Hunter》、《福爾摩師奶》、《十八年後的終極告白》甚有發揮外，近年還憑《愛‧回家》「關彼得」一角成功入屋！
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
|
鍾意就快D Share啦！
|
|
|
