女星陳法拉今年首度入圍金像獎影后，硬撼影后級的章子怡以及廖子妤，所謂初生之犢不畏虎，法拉揚言在導演張家輝的助攻下，對自己的演出充滿信心，但獎項則不在自己控制範圍內，並期望未來將更多時間放在港產片上以支持香港電影業，笑言下部作品可跟家輝身份對調，由自己充當導演，讓張家輝來演。
女星陳法拉憑電影《贖夢》首次角逐今屆金像獎最佳女主角，迎戰兩大影后章子怡及廖子妤，還有內地百億票房女星馬麗與星二代許恩怡，法拉透露已相隔10年未有拍攝港產片，對首次提名大為感動又感恩：「好多謝觀眾同行家嘅支持，證明大家冇忘記我，好感恩。」
面對一眾勁敵，問有否信心突圍而出摘下影后寶座時，她坦言對自己的演出充滿信心：「我演嘅時候係帶住充足嘅準備，加上對劇本同導演嘅信任，今次係張家輝係自己寫劇本自己導演，同我一齊演對手戲，佢對角色拿挰好準確，佢又係一個好演員，佢同我講解角色嘅時候係好清晰，所以我演嘅時候係帶住好準確同清晰嘅自信，知道自己要點演，同放手去信任演導畀我嘅指引去做。」不過她認為得獎與否就不在自己控制之內：「每個獎都有好多因素，每個角色都好難去比較，每個演員一定係做得非常好先有機會入圍，我對自己嘅表演有信心，但攞獎就係我控制同理解之外。」
講到其他對手的演出，她稱因身在海外，故未有機會觀看其他入圍者的作品，所以難以評價，但大讚她們各有千秋：「好似章子怡係好資深嘅影后，仲有後生啲又可以獨當一面女演員，令香港電影界女演員方面無斷層，已經好欣慰、好開心，有咁豐富同有發揮嘅女性題材電影出現，我好戥香港電影圈開心。」
講到她在片中要化醜妝又要演繹精神失常犧牲大，她開玩笑指終於有人找她做回自己，其後才正經謂：「如果唔係精神失常有咁大跨度，我未必會接，終於有得畀我發揮，唔係只係演人哋嘅老婆或者一個普通OL，演呢啲戲對我來講比較自如，好適合我，多謝導演同監製完全信任我，我演得好開心同過癮，我愈醜愈癲仲開心。」
她表示跟張家輝合作愉快，稱讚對方有想法及有獨特的審美觀，望再度合作：「希望有《贖夢》續集，或者下次我做導演，佢做演員。」她直言想多放時間拍港產片，但礙於要照顧小朋友，不能離開太長時間：「拍電視劇就唔得，但如果電影拍半個月或一個月都可以，好多香港導演都冇合作過，希望下次可以試喜劇或者挑戰大啲角色可以搵我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|