今年香港電影金像獎，影后之爭被喻為「死亡之組」，首度入圍的廖子妤雖獲導演會頒發獎項先拔頭籌，但面對章子怡及陳法拉等勁敵，她謙稱並非勝券在握，曾坐冷板櫈的她亦擔心中「魔咒」3年冇Job，思維不時遊走於勝負之間，笑言似精神分裂！
《第44屆香港電影金像獎》明日舉行，當中「最佳女主角」之爭非常激烈，廖子妤（Fish）要跟憑電影《醬園弄．懸案》入圍的「三金影后」章子怡、憑電影《水餃皇后》入圍的馬麗、《贖夢》的陳法拉及《無名指》的許恩怡拗手瓜，早前她在導演會頒獎禮率先獲頒「最佳女主角」，總算為金像之爭打了強心針，被不少網民推舉為影后大熱。Fish日前接受本報獨家專訪，對於獲睇好封后，她謙稱：「大熱都會倒灶嘅，坦白講獎一定想拎，因為未必再有機會，下次可能要等20年呢？不過真係攞唔到都冇所謂，我比較關心有冇戲拍就真。」
身為戲癡的她已欣賞過幾位勁敵的作品，笑言：「位位都有值得欣賞嘅地方，尤其章子怡天生一張電影臉，佢出現就話畀大家知咩係大製作。我好記得早年入圍『最佳新演員』，當年就係章子怡勇奪影后，估唔到今年我有機會同佢爭獎。嗰年梁朝偉、古天樂同郭富城等都有出席，到依家情景仲歷歷在目！當時我覺得一次過見到咁多大明星好震撼，哈哈！」
曾坐冷板櫈自薦試鏡
回望過去的演藝路，Fish自爆坐過冷板櫈，沒戲拍的日子會留意各劇組動向，然後自薦試鏡：「好似余香凝當年憑《白日之下》攞咗金像獎影后，其實嗰套戲我都有去試鏡，後來余香凝被選中，我都好戥佢開心㗎！」
來自馬來西亞的她對香港有深厚情意結，14年前選擇飄洋過海來港尋覓發展機會。今時今日這位別人眼中的金像獎準影后，其實有鮮為人知的陰暗面與壓力，某程度上依然缺乏自信，難怪談到今次「封后」勝算時，她坦言：「金像獎愈嚟愈近，我嘅焦慮同壓力就出現，心裏面好似有兩個自己，第一個話『攞獎3年冇戲拍點算？』另一個就反駁：『你實攞嘅咩？』好似精神分裂，但明白好多嘢控制唔到。」
其實Fish的入行經歷與舒淇有點相似，同樣是隻手來港打天下，為求機會只可放手一博，作出大膽裸露演出。驀然回首，她形容當時的自己：「好似熊火放喺面前，火入面有我好想要嘅東西，所以選擇伸手入火堆拎起條鎖匙，我做出咁大嘅決定，應該證明到絕對嘅誠意啩！其實到依家都有人講起（裸露戲），甚至有人將當時嘅劇照私訊番畀我，我好唔明佢哋嘅諗法，係咪想傷害我？坦白講當時我都只係想搵個機會啫，同埋演員係應該要盡量滿足角色需要，盡量去說好故事嘛！」
場地提供：香港麗晶酒店Qura Bar
化妝：Melody Chiu
髮型：zap tang
本文作轉載及備份之用 來源 source: http://hk.on.cc
|
鍾意就快D Share啦！
|
|
|