2014年2月7日 星期五

[忽然1周 967] 細女包尾輪流呵 林狗彭羚球場晒恩愛 林狗,彭羚,林海峰,MW,




學校運動會由上午八時半玩到下午四點幾,彭羚陪足八粒鐘,晚晚做騷的林狗一早一晏揸車接送。放學時,林清撇甩媽咪,再樹熊上身要老竇抱,嗲到暈。

娛樂喧

細女包尾輪流呵 林狗彭羚球場曬恩愛

軟硬廿五周年騷由上月廿三日做到馬年大年初一( 31/1),一連八場演唱會,林海峰(林狗)施展渾身解數,又同女 dancers跳辣身舞,艷福不淺。

林狗和彭羚結婚 16載,二人先後育有十四歲林泳及九歲林清兩個餅印女。孻女拉心肝,在演唱會期間,兩公婆晨早八點一同陪林清參加學校 Sports Day,兩公婆在球場內,更罕有地公開攬住繑手曬恩愛,至於 60米賽跑包尾的林清,扭阿媽老竇又抱又孭,嗲到父母陀陀擰。

其他影片

紅館賺到笑

林狗日前和老死葛民輝開紅館騷,連續踩八晚,以一場賺 60萬來計,林狗便賺近 500萬過肥年。難得他開騷期間仍晨咁早陪愛女去 Sports Day。

前排在銅鑼灣與母親彭羚 high tea的十四歲大女林泳,亭亭玉立,轉讀國際學校後,引來不少竹升仔追求,令她有感情煩惱,要阿媽開解。當年因為家姐關係入讀拔萃女小學的細女林清,亦已就讀四年級,仲有兩年便升讀中學。

孻女拉心肝

由於她是家中最細,加上性格活潑好動惹人喜歡,是全家的掌上明珠。上月 27日林狗即使晚上要做軟硬演唱會,也不惜捱眼瞓,晨早揸車送老婆及女兒,由淺水灣寓所到鑽石山斧山運動場,參加學校 Sports Day。

無乜運動天份的林清參加了 60米短跑,開始時好有爆炸力,可惜後勁不繼,差不多到終點時見自己大墮後,索性 hea跑。包尾的她心情失落,要彭羚又抱又孭錫錫,而負責接送的爸爸林狗都有抱抱呵番,林清好快忘記唔開心事,拖住老竇跳跳紮走出運動場。雖然阿女包尾,但運動日卻造就原本各有各忙的林狗和彭羚,大曬溫馨甜蜜場面。現場所見,二人不時耳語,林狗更在眾多家長面前,輕攬老婆腰肢,結婚多年,依然恩愛。

激罕親密

結婚 16年,林狗、彭羚極少人前恩愛,當日晨咁早送老婆同囡囡去運動會的林狗,竟然當眾攬實老婆。彭羚亦禮尚往來,罕有地繑實老公隻手,球場上大曬恩愛。

hea跑包尾

在女拔就讀小學四年級的林清,當日參加 60米賽,開頭全力以赴,可惜尾段唔夠力跑,見其他同學仔過曬頭,跑包尾的她 fing手 fing腳,彈彈下 hea跑到終點,表情失望。

媽咪抱抱

包尾心情低落,行番上看台的林清,即扭媽咪抱抱,𠱁咗一輪,林二小姐依然唔多高興,彭羚惟有出絕招,孭住阿女四圍行,原本 keep住撲克臉的林清,終於笑番曬。

齊做義工

已退出娛樂圈做全職媽媽的彭羚,在校內義務幫手搞不少學生活動。當日她負責指揮阿女所屬的黃組啦啦隊,至於在場內俾面逗留兩粒鐘的林狗,當日亦手指指、指揮同學仔坐位,好唔得閒。

自製餐盒

彭羚全日指揮啦啦隊,忙到有氣冇碇唞。比賽完後,才有時間坐低食自家製餐盒。

狂打喊露

阿女參加學校 Sports Day,林狗即使晚晚在紅館開騷,都晨咁早碌去運動場為愛女打氣,不過唔夠瞓嘅佢,在球場內頻頻放蚊。至於全日冇停過的彭羚,辛苦咗一日,臨尾亦忍唔住在其他家長面前打喊露,兩公婆攰到震!

其他影片


鍾意就快D Share啦!
Related Posts Plugin for WordPress, Blogger...