抵港曬訂婚戒
Stephy抵港見到記者即時笑到四萬咁口，仲大騷右手中指上的 Tiffany訂婚鑽戒。而 Stephy與鄧媽媽的一身打扮，與她們四日前飛北京時一樣。
滾熱辣
新年帶阿媽傾婚事 Stephy方力申年尾擺酒定居北京
鄧麗欣（ Stephy）與方力申拍拖十年，近年不時傳出二人秘密結婚，不過只聞樓梯響。
自 2012年農曆新年，方力申表弟在微博上載與兩人的合照，不慎踢爆他們在北京度歲見家長後， Stephy每年赴京與方力申一家食團年飯已成習慣。
今年兩人關係再有新突破，因為方力申的外公外婆早前身體不適入院，希望盡快飲到孫新抱茶，故方家決定年尾擺酒沖喜。 Stephy於年廿九（ 1月 29日）更帶同母親齊齊飛北京傾婚事，並有意和方力申於北京置業作為婚後定居之用。
即將踏入 34歲的方力申和 30歲的 Stephy，雖然屢傳婚訊， Stephy早前更被發現車牌換上「 SF」字頭，即係 Stephy Fong縮寫。但她堅稱自己未婚並非方太，但據知今年年尾這個稱呼絕對用得著。
方力申媽媽是北京人，外公外婆亦長居北京。自 2012年 Stephy被踢爆到北京方力申家拜年後，便傳出二人已秘婚多年。而事實上，方力申是個非常傳統的中國男人，家中老幼對 Stephy印象很好，故此結婚一事必定要明媒正娶，高調處理。
據知情者透露：「佢兩個都咁多年，小方知道 Stephy同大部分女人一樣，都想要一個幸福美滿嘅家，始終單親家庭長大對 Stephy嘅影響好深遠，所以未到真正結婚嗰刻， Stephy都唔會認自己係方太。」
首次帶母赴京
往年 Stephy都是獨自到北京和方力申家人拜年，但今年年廿九（ 1月 29日）下午 4時 30分，本刊記者卻見到鄧媽媽陪 Stephy入閘登機飛北京，而身穿彩藍連身裙的鄧媽媽明顯經過細心裝扮，相信是一落機便和方力申家人食晚飯。據知情者透露：「今次係真㗎喇！因為小方嘅外公外婆身體唔係咁好，之前仲入咗院做過手術。小方早前專登飛去北京探病，仲應承老人家會盡快結婚同生仔，所以今年 Stephy先會同阿媽去過年，仲帶埋成喼參茸海味作禮物兼傾婚事。老人家見呢個未來新抱仔咁識大體，不知幾開心，聽聞佢哋會喺年尾擺酒，仲要搞足三日。」方力申外公外婆將近百歲，為遷就行動不便的兩老，方力申決定先在北京設宴，再到雲南方氏祖家擺酒，最後才回港廣宴親朋。
Stephy和鄧媽媽今次去北京住進方力申外公老家，位處湖邊的傳統四合院，環境清幽雅致。在年三十晚，方力申更於當地出名的老酒家訂枱食團年飯。踏入大年初一，眾人更在家中食自家製的素餃過節。由於鄧媽媽首次到北京過年，方力申和 Stephy更親自帶她四處觀光。
自爆見家長
年初二（ 1日） Stephy與母親乘坐早上十時的飛機返港，下午二時抵港出閘，鄧媽媽發現記者後即時一個箭步彈開，最後亦應現場記者要求與 Stephy合照。 Stephy先笑說自己沒帶利是在身，之後突然自爆新年期間和媽媽去北京，此行是到男友家中拜年：「小方每年都會返北京同家人過節，我當然會去同佢家人拜年，呢個係禮儀。我去咗好多年喇！我哋有一齊食團年飯同食餃子，不過今朝坐早機返香港，所以冇一齊食早餐。（今年係咪有喜事宣布呀？）宣布咗啦！咪過 Paco度囉！（年尾正式做方太？）唔話你知，哈哈哈！」
小方在大年初一晚，亦在微博上載一幅由內地著名藝術家祁志龍繪畫的油畫，畫中人正是 Stephy，小方還打趣問：「這張畫漂亮嗎？」如此高調曬恩愛確實少見。記者更發現， Stephy右手中指戴上一隻鑲滿碎鑽代表「訂婚」的 Tiffany戒指，而且任影唔嬲，好事近心情明顯靚。
北京置愛巢
近年方力申和 Stephy孖住北上搵人仔，歌影視三棲發展，工作不斷，單是去年小方收入已逾二千萬， Stephy亦過千五萬。二人早前曾公開表示希望在北京擁有個人物業，雖然 Stephy屬事業型女性，上月已簽香港 Paco太陽娛樂文化旗下，但她婚後亦不介意中港兩地奔波。
最近兩人在港島區薄扶林以 5萬 6千元租下二千呎新愛巢，而非買入做業主。據知方力申早已計劃婚後搬回北京和家人一起生活，所以要留多點銀彈在北京置業。相信今個馬年是方力申和 Stephy修成正果的一年。
四日三夜北京之旅
歡樂的時光過得特別快， Stephy年廿九出發上京，年初二回港，唔計頭尾兩日，其實只有兩日時間在北京。雖然來去匆匆，但 Stephy已見曬方家親友，仲一齊食團年飯。
情侶檔搵人仔
近年小方與 Stephy主攻內地市場，更不避嫌以情侶檔姿態接工作。 2010年兩人首次合作拍大陸劇《風雨桃花鎮》，一於夫唱婦隨搵人仔。隨住 Stephy上月簽 Paco的太陽娛樂文化，據知小方稍後亦會加盟，再次一家親。去年兩人分別拍了多套劇集及電影，小方更在內地頻頻接騷，豬籠入水。
|
鍾意就快D Share啦！
|
|
|
