楊崢旺「夫」黃宗澤隨時閃婚
無綫藝人黃宗澤（Bosco）自與名模楊崢爆出「崢澤戀」後，兩人在鏡頭前均表現得甜蜜滿瀉，雖然一對戀人都聲稱互相了解當中，但事實打得火熱的程度已提升至另一層次。楊崢開著Bosco座駕宣示主權之餘，更拜會過家長。Bosco今次難得坦蕩蕩公開戀情，看來對楊崢已到難捨難離之地步，下一步閃婚，亦指日可待。
黃宗澤（Bosco）與楊崢被《東網》獨家踢爆譜出「崢澤戀」已達三個月，初四更被拍得在西貢Sweet爆親吻，流出珍貴「啜蜜圖」。雖然兩人日前均一臉冧樣承認互相了解中，但實情兩人關係已經穩定得打風都打唔甩，據知一對戀人更已拜會雙方家長，隨時有機會一拍即合，極速閃婚。
熱戀中的Bosco似乎對女友滿意爆燈，曾私底下向朋友大讚楊崢旺「夫」，除了早前踩入飲食界開蠔吧外，又接Job接不停，更被國際影星周潤發點名大讚上位有望。而一眾好友對Bosco公開的態度也大感意外，因Bosco與前度胡杏兒就算拍拖多年也沒在公開場合拖手，更遑論窗外一吻，所以好友對兩人感情發展之快均嘖嘖稱奇，估計他們有可能隨時閃婚，私底下更以「阿嫂」稱呼。對於被指會閃婚，楊崢於電話中回應：「冇咁快，我相信緣分安排。」
希望安靜發展
昨日下午約三時，Bosco駕駛其黑色Benz離開火炭寓所，前往將軍澳電視城為新劇拍攝海報，在電視城遇到記者即說：「依家忙去拍新劇海報，轉頭再講。」之後就急步離去。約三小時後，完成拍攝的Bosco離開電視城時被問到會否與楊崢閃婚？他說：「大家畀啲時間，唔好畀咁大壓力我哋，我哋想安安靜靜咁發展。」
另一方面，榮升「澤嫂」的楊崢昨日如常返回電台主持節目，吸引大批傳媒等候。做完節目後，楊崢春風滿面離去，見到在場傳媒一臉驚訝地說：「咁多人喺度嘅？」問到何時正式公開戀情？她「夫唱婦隨」說：「了解中，互相了解緊，畀啲空間我哋。」問到她幾時與Bosco拖手出街？她表示接受大家祝福：「暫時呢一、兩日唔會，其實都唔明點解大家咁關心我哋，不過好多謝大家祝福。」
杏兒祝馬上開心
至於日後會否保持低調？楊崢說：「不嬲都做自己，應該唔會刻意高調，其實我哋冇嘢收埋，如果係都前後腳出現。」受訪後楊崢就駕駛著Bosco的古董車離開到商場用膳，期間心情大靚的她不時叮囑記者小心，並向記者說：「辛苦曬。」之後就駕車返回住所。
此外，Bosco舊愛胡杏兒昨晚在微博上載一張貓照，並留言指已回來重投工作擁抱，並祝大家新年馬上開開心心。
文：音樂組
攝：追蹤組
|
鍾意就快D Share啦！
|
|
|
