2014年2月26日 星期三

[FACE 353] 合理懷疑 四方角變尖 狂刪削骨留言 胡鴻鈞:阿媽懷疑我整過 胡鴻鈞,MF,




對於不斷被高登巴打狙擊削骨變臉,胡鴻鈞堅決否認整容,更任影多角度素顏照,仲叫記者摸嚇添!

真面目

合理懷疑 四方角變尖 狂刪削骨留言 胡鴻鈞:阿媽懷疑我整過

高登巴打威力不容忽視,天然呆馬國明做完第一屆「高登男神選舉」,俾人捧到上天;話咁快第二屆又開始投票,今年有 16人爭男神寶座,當中仲有 3個另類黑馬,分別係肥佬林雪、公開出櫃嘅何韻詩,同得罪高登仔被笑「削骨還父」嘅胡鴻鈞。

雖然所謂嘅入選準則得啖笑,暫時黃子華領先第一位,但長期被巴打追擊四方面變尖嘅胡鴻鈞,都上咗第三位,佢仲話:「阿媽懷疑我整過!」娛樂圈呢行,最驚冇人講啫!

10年,胡鴻鈞參加《超級巨聲 2》時四方面起曬角,𠵱家塊面(右圖)的確冇以前咁腫脹,兩邊腮骨又離奇變尖,難怪惹來整容傳聞。

上屆「高登男神選舉」由馬國明奪得冠軍,一句承認有睇過 AV深得巴打歡心,人氣升自然收入大增。本屆黑馬胡鴻鈞參加《超級巨聲 2》時,由方面慢慢變尖,巴打一路以來不斷狙擊,話題愈多,隨時揮低其他勁敵㗎!

「畀你摸嚇喇!」

方面突然變尖,惹來不少整容傳聞,不少巴打更指他做過削骨手術,自製「削骨還父」、「孝感動天」潛力圖,更集體狙擊他的 Instagram帳號,單單一張自拍照都有千多個留言,有攻擊、亦有歌迷力撐。

週日( 23日),胡鴻鈞到荃灣睇籃球賽,本刊上前追訪兼拍了多角度近照,胡鴻鈞起初都有些抗拒,後來仲叫記者︰「畀你摸嚇喇!」

得罪網友源頭,事源有人在胡鴻鈞的 Instagram內留言指他整容,但留言卻被刪。問到點解刪除了有關留言,胡鴻鈞解釋︰「我冇刪過任何留言,聽朋友講如果有投訴,官方可能會刪除有關留言,我點敢得罪班巴打呀!」

因為一張自拍照,隨即引來大批網民留言指削骨整容,留言高達千六個。網上圖片

巴打又上載胡鴻鈞《巨聲》時和現在的對比照,咁又真係差好遠喎!網上圖片

有位高登巴打開 post,指胡鴻鈞刪除留言及被列入黑名單,言語間仲刻意煽動巴打集體攻擊。

週日,胡鴻鈞未受整容傳聞所影響,單拖去到籃球場支持朋友比賽,對於整容傳聞冇迴避,抵讚!

想攞第一

胡鴻鈞話連阿媽都懷疑過佢有整容,胡太,你應該最清楚喎!網上圖片

有份入選今屆「高登男神選舉」,胡鴻鈞說:「自己冇乜留意,收到朋友訊息先知呢件事,覺得好意外,都想攞第一㗎!聽講贏咗之後會豬籠入水。(其實有冇整容?)《巨聲》嗰陣又要讀書又要做嘢,邊有時間整,要整都要唞番幾個月啩?我暫時唔會考慮整容。(塊面真係瘦曬喎?)其實我睇番啲相,都真係有分別,我諗化妝好大關係,我係有同化妝師溝通過,專登叫佢化得塊面瘦啲。而且我 keep住一星期跑 2至 3次步,每次一個鐘,都有影響嘅。」跑步瘦面?你信?

整容傳聞愈傳愈誇,胡鴻鈞話連阿媽都有懷疑佢,他說︰「阿媽都有懷疑我整過,有日返屋企,佢走過嚟捽我塊面,仲好仔細咁檢查,之後就讚我靚仔咗。」消失的腮骨去咗邊都好啦,胡鴻鈞可以考慮作番首歌紀念嚇!

男神入 3甲

黑馬胡鴻鈞在高登討論區隨處搵到改圖,人氣急升,現票數第三,分分鐘爆冷跑出。

冠 黃子華

亞 張國榮

第三位 胡鴻鈞

今屆「高登男神選舉」,上週六晚已經接受投票,直至 3月 8日結束投票,未到最後一刻,仍未知冠軍誰屬。

第二屆「高登男神選舉」,今年入選單位比去年少,只得 16人,直至下月 8日投票正式完結。選舉的準則冇人知,質素更加參差不齊,有吳鎮宇、謝霆鋒、吳彥祖等型男,亦有九唔搭八林雪,當中最搞笑梗係何韻詩,呢頭宣布出櫃,就即刻榜上有名,巴打擺明玩嘢!

黑馬

林雪

「女神」有魯芬 BB,「高登男神選舉」就有林雪做代表,陪跑成分居多。

何韻詩

「高登男神」竟然有何韻詩,現時走勢緊貼發哥和吳彥祖。

包尾

郭偉亮

郭偉亮扮 Iron Man有 9成似,不過暫時包尾,似乎巴打唔多 buy。

冧莊?

馬國明

上一屆「高登男神選舉」冠軍馬國明,自爆有睇過 AV而深得巴打愛戴,但睇走勢今次冧莊機會唔大。



鍾意就快D Share啦!
Related Posts Plugin for WordPress, Blogger...