《星星》中，全智賢住醫院時，曾對金秀賢講咗句：「初雪，怎能沒有炸雞和啤酒？」即掀起炸雞熱潮，呢股熱潮最近仲席捲大陸、台灣及香港，呢排唔食炸雞就好 out啦！
星星報告
潮食炸雞
「頌伊女神」全智賢唔只成為美容及時裝指標，她隨口噏句：「初雪，怎能沒有炸雞和啤酒？」又耐唔耐食嚇，即掀起炸雞及啤酒熱潮，「炸雞潮」更由韓國吹到香港。
位於尖沙咀韓食集中地金巴利道，就有兩間炸雞專門店，元祖店李家及新開業的紅雞，最近食正炸雞熱潮，日日爆棚冇位剩，而紅雞的韓籍老闆呂先生更向本刊表示：「的而且確《來自星星的你》播出後，我哋真係多咗好多生意，好多女仔帶埋男朋友嚟話要食炸雞。𠵱家九成客人都係香港人，尤其最近天氣轉冷，更多人專誠走嚟食炸雞。真係要同全智賢講句：『多謝！』」
日日賣清
店內擁有十多款炸雞菜式，但最受歡迎係呢款無骨半半炸雞，因一半是原味，一半是香辣味，一次過試曬兩種口味。因店內仍未領到酒牌，所以客人可以自攜啤酒入內，實行炸雞配啤酒。記者親試，無骨原味炸雞比韓國一般的 size少一點，但風味夠地道、香辣味就似廣東菜咕嚕肉。
紅雞（新店）
尖沙咀金巴利道 65-67B號太平洋大廈 UG層 B鋪
元祖
李家位於韓食集中地金巴利道。該鋪店員話，最近好多客人專誠去該鋪點炸雞，忽略咗其他美食。論味道及外形，「李家」最似地道韓國炸雞。即比中國人的炸雞或 KFC的炸雞香口，而肉質亦較鮮嫩。
雞醬都 Hit
炸雞本身勁 hit，連帶周邊產品好似點炸雞的燒烤醬都成為熱賣產品。韓式雜貨店新世界 Mart店員話，近排唔少港人自己整韓式炸雞，所以多咗好多人買點炸雞嘅燒烤醬。
韓國宣傳大使 Sue：四季都食炸雞
最近於 YouTube教韓文教到出曬名的混血韓妹 Sue（張厚耀），就話細細個已好鍾意食炸雞，「其實早年 KFC炸雞於韓國已大受歡迎，之後韓國人將美式炸雞改良，再加入秘製醬料去炸，便成為韓式炸雞。由於炸雞喺韓國好普通，所以無論春、夏、秋、冬都有人買來食。全智賢話落雪要食炸雞其實係搵個藉口，不過最受歡迎就係有球賽舉行時期，好多韓國人都會邊食炸雞邊睇波，氣氛 high好多。」
《星星》× LINE
《星星》商機無限，播到中段 LINE才成贊助商，加上大量玩 LINE情節。千頌依一飲醉就狂 send LINE畀都 manager，一眾星星迷自然非 LINE不玩。本刊向 LINE香港公關查詢，發言人 Elaine話因為劇集一出街時就不斷收到 LINE用戶要求想要《星星》 sticker，初時大部分客戶都要求想要千頌依嘅頭像 stickers，但暫時無論喺韓國、香港、中國、新加坡、菲律賓等最多人下載係千頌伊化身 Cony的特別版。而暫時亦只有《星星》會推出 stickers，其他劇集暫不考慮推出。
|
鍾意就快D Share啦！
|
|
|
