情人節前一日都要傾公事，千嬅梗係唔多願意，仲要佢出頒獎禮爭獎，機會唔大囉！
FBI
氹開騷爭獎 千嬅 hea珊珊
生完之後密密接戲嘅楊千嬅，成功做埋金像影後，但有成年幾冇出新歌，唱片公司梗係頭痕。話說自從林珊珊入咗寰亞，重整旗鼓搞好唱片部，但 Sammi、何韻詩一向自己話曬事，仲有傳 Sammi會跟許志安過檔 Paco「太陽娛樂」添！
據知，林珊珊正出力遊說千嬅復出年尾頒獎禮，仲話幫佢開跨年演唱會。其實今年初咁多樂壇頒獎禮，千嬅已經全部 no show，可見丁太已經唔想玩頒獎禮遊戲，寰亞只好靠王菀之爭獎！據聞寰亞好想千嬅今年全力出碟，年尾再參加頒獎禮，「省靚」番公司招牌。
早前， FBI就撞到林珊珊同千嬅喺銅鑼灣 Cova密斟， FBI仲八到當日佢兩個傾到頒獎禮話題時，千嬅即時耍手擰頭，仲有少少火藥味，而且當日千嬅一拖三，兩個助手連老公丁子高，雖然丁生同場唔同枱，不過四對一點會冇壓力？唔怪得走嗰陣， FBI問千嬅係咪開演唱會？佢大大聲咁話︰「佢（林珊珊）想我開咋！」有時候，咁大粒星又唔等錢使，點迫喎！
本來千嬅身邊有位跟咗多年嘅經理人，據聞最近辭職，林珊珊將接手千嬅嘅電影和唱片。話曬返咗工年幾，林珊珊都要交成績，睇佢傾得幾肉緊！
千嬅已兩年冇出席頒獎禮，上年畀面商台，出席叱吒捧走「我最喜愛女歌手」，今年點都唔去，由何韻詩冷手執個熱煎堆。
|
鍾意就快D Share啦！
|
|
|
