19/2 10:35am
全智賢呢身打扮，其實同一般市民落街買餸差唔多，好在女神天生麗質，即使係睡衣都穿出星味。
封面
來追星星的你 封場食西餐 5助手服侍 全智賢排場勁過千頌伊
《來自星星的你》今個星期四（ 27日）大結局，唔到最後一集都未知係大團圓定悲劇收場。韓劇鍾意邊拍邊播邊改劇本保持神秘，不過韓星真面目就冇得收埋。本刊繼上期首爾直擊「都敏俊」金秀賢生日開工直踩 20粒鐘，今期貼身追訪女主角全智賢，揭開一代「國民女神」神秘巨星生活。
本刊發現女神排場強勁，無論開工定放飯都有 5名助手跟身，食飯又要封場隔開其他食客，比劇中「千頌伊」更駕勢。一般市民想飛去韓國埋身追星影合照，都係慳番啖氣行明洞好過！
- 趕拍《星星》結局 全智賢大家姐出巡
《來自星星的你》本週四大結局，一班主角在結局播出前繼續趕工冇得唞，日拍夜拍，兩位主角每日最多瞓幾粒鐘又要再搏殺。人氣強勁如金秀賢，生日正日都冇假放，照踩 20粒鐘搏命。
睡衣坐 Benz
上週三（ 19日）早上 10點， 32歲全智賢由司機駕平治房車接載到麻浦區一棟大廈拍戲，一身疑似睡衣打扮的全智賢，明顯未瞓醒，眼矇矇頭耷耷，又不時嘟起嘴唔多高興。不過只化了淡妝的全智賢輪廓分明，皮膚白嫩，比起好多廿幾歲女星保養得更好。
相比起金秀賢要一早起身坐保母車到髮型屋 set頭化妝，貴為天後級的全智賢有私人化妝車，只需由 Benz行幾步即可跳上一部黑色保母車化妝兼換戲服，一條龍搞掂，無需舟車勞頓之餘又可保持私隱，想睇女神素顏都唔係咁易。
今日拍明日播
《星星》於本週四（ 27日）大結局，劇中男女主角金秀賢及全智賢正加緊趕工。本刊連日於首爾直擊發現拍攝時間超緊湊，如今日拍完的戲分，翌晚便出街，這緊湊時間表亦成近年唔少韓劇的製作標準。
前年，由 Super Junior主將崔始源主演的韓劇《電視劇帝王》，曾透露拍韓劇的嚴謹程度，由於韓國三大電視台拉成均勢競爭大，每集韓劇播放期間，監製已𥄫實每分鐘收視，隨即開會檢討，如收視只輕微下跌半點，便會如臨大敵，商量一下下一集應加入甚麼元素可刺激收視，唔怪得韓劇咁受觀眾歡迎嘅。
撲 2街買凍飲
拍了約一小時左右，全智賢身穿一件黑白 tweed外套戲服，聯同 5名近身由片場出發，以為又要轉場拍戲，原來係女神肚餓，所以一行多人大陣仗分兩架車到附近一間日本餐廳食午飯。女神跟 3名助手直接行入 VIP房開餐；而 2名身材高大的男近身則坐近門口把風，防止有記者或狂迷埋身。
食了 45分鐘，至中午 12時多填飽肚的全智賢罕有地行超過十步到停車場上車，其間不斷篤電話，未知是否同老公崔俊赫玩緊 LINE呢？返片場前，女神繼續千頌伊上身，勞師動眾兩度停車，為的只是買一杯凍飲。第一站冇收穫，女神竟然面燶燶怒睥女助手，然後迅速跳上車去隔籬街再買，之前落車想買外賣的全智賢，今次決定安坐車上等，免得冷病。
女神操
同金秀賢拍完的士戲，全智賢開心到手舞足蹈，又狂 fing腰伸展，心情超靚。
5粒鐘食 2餐
食飽飯又歎埋飲品，全智賢返回片場繼續拍，後來金秀賢亦有加入。當日是拍第 19集戲分，講大奸角李載經以都敏俊名義約千頌伊食飯，更點了千最愛的紅酒，其實是在酒內落毒，好在都敏俊瞬間移動趕得切救愛人。
短短 1分鐘戲，劇組用了近 4個鐘拍攝。到下午 4點多，全智賢又再出動醫肚。有別於港星，阿姐級的全智賢絕對唔會在片場捱飯盒，今次她命司機駕車到距離首爾市中心近 1小時車程的高陽市日山區歎意大利菜。
可能體力透支太大，女神落車後連褸都要助手幫忙穿上，而且女神竟然著上鴛鴦拖鞋，比在家中的千頌伊更不修邊幅。記者嘗試入餐廳食飯，隨即被全智賢兩名大隻近身一左一右監視，直至聽到記者講英文，二人先放下戒心。後來記者要求坐低飲咖啡，即被侍應指示坐到餐廳另一個角落，離全智賢大約有 12碼遠，全智賢恍如包場食飯。
24/2
週一（ 24日）下午，全智賢同金秀賢又去了劇中寓所、木洞 Trapalace大堂拍攝。
金秀賢靠自己
週六（ 22日）一早搵金秀賢返回 SBS片廠為《星星》趕工，至傍晚拍畢，即回家休息，全智賢則於週日（ 23日）現身。劇組於當日早上拍攝千頌伊跟都敏俊搭的士戲，鏡頭外，兩位主角近乎零交流。拍了近 1小時，兩人一齊落的士，乖仔金秀賢自己拿隨身物品上保母車，反而兩手 fing fing的全智賢就行去其助手及司機等身邊，跟他們有傾有講。之後心情勁靚的全智賢跳住上車，返回錄影廠繼續拍攝。
之前有傳金秀賢因心律不正問題，不適宜操勞， 26歲仔日捱夜捱又少人照顧。反觀 32歲全智賢全天候有成村人服侍，又唔使捱飯盒餐餐食好嘢，唔怪得二人年齡相差 6年，外形都冇太大分別啦。
趕足 9日
記者於首爾直擊《星星》拍攝，劇組由星期一至星期日均日日開工，完全冇休息過。
有天避過大難
《星星》結局後，將由 JYJ最紅成員樸有天主演的 SBS最新韓劇《 Three Days》接棒， 3月 5日開播。
故事圍繞有天飾演的總統警衞員，因總統在三聲槍響後神秘失蹤，有天誓死尋找總統下落。仲有 9日就開播，有天最近亦開行 turbo趕拍，不過有天最近因要應付大量動作場面，而拉傷韌帶，搞到要戴保護帶開工。
黑開有條路，上週六（ 22日），本 SBS片廠門外等《星星》開工期間，卻目擊《 Three Days》的攝制隊車突然著火，而且還燒到冒煙。好彩當時有天不在車內，否則主角受傷就大件事。
|
鍾意就快D Share啦！
|
|
|
