掃呢頁CODE去手機

2014年11月6日 星期四

[壹週刊 - 1287] 父女情斷 受屈 19年 容祖兒老豆大反擊:佢冇俾過錢我 祖兒,容祖兒,M1,




為顧及母親感受,容祖兒近年刻意同父親不相往來。

娛頭

父女情斷 受屈 19年 容祖兒老豆大反擊:佢冇俾過錢我

三十四歲已經手執兩億六物業的容祖兒,今年三月被揭只丟低一千蚊俾阿爺過年,之後自爆同生父容錦輝:「無聯絡!」

一直屢傳欠債的容父,近日在跑馬地區被張貼印有大頭照的追債街招,不想父債女還的容祖兒,急急透過公司同父親撇清關係:「作為女兒責任做盡!」

十九年前父母離異,與母親及細佬相依為命的容祖兒,多次暗示要在金錢上照顧當年拋妻棄子女的父親。一家唔知一家事,被指爛賭欠債的容錦輝,決定開腔還我清白:「佢(祖兒)無同我還過錢,亦無俾過錢我做生意!」













父女情斷

容祖兒對住只有拍拖兩年半的劉浩龍,任由對方自由進出半億豪宅,甚至俾埋百萬波子男友代步,相反,跟有血緣關係的生父容錦輝,卻不相往來。

今年三月,容祖兒細嫲同朋友吐苦水,指天后級「哎吔」孫女只丟低一千蚊給兩老過新年,有失身份。當時容祖兒回應:「屋企事處理得好好……至於爸爸,就無聯絡。」

曾屢傳欠債的容父,近日被人在跑馬地區張貼印有他相片的追債街招,內容寫上「尋人——此人 容錦輝,仍係樂壇天后容××之父親!招搖撞騙,欠債唔還,見字速聯絡,否則後果自負。」

事發後,容祖兒黑面避傳媒,並由經理人霍汶希代為發表父女斷親論:「咁多年祖兒一直由媽咪獨力撫養成人,關於爸爸嘅嘢,佢作為女兒責任做盡,祖兒為咗捍衞家人,以後老豆出面發生任何事,都同祖兒無關,佢唔會回應亦唔會負責,當下最重要只有母親,其他嘢,唔理。」



容父的追債街招張貼在容祖兒居住的跑馬地區,包括養和醫院,甚至女兒老闆楊受成旗下的酒店都有。

欠債貼街招

小時候父女關係融洽,但到容祖兒 15歲,容父與前妻離婚,父女關係日趨淡薄。

無爭人錢

除了被人貼追債街招,再有報導指事件同容父爛賭、欠下三十萬賭債有關,同時亦揭發他今年一月欠稅二千多元。

負面消息浪接浪,本刊聯絡上當事人容錦輝,他連珠炮轟:「你哋真係唔好騷擾我屋企人啦(指有傳媒追訪容祖兒嫲嫲),啱唔啱先?佢老人家,你哋圍住佢,七十多歲啱啱先做完手術,隻腳又唔係咁方便,整到佢,你哋於心何忍先?

「我都係講嗰句,我搵嘅每一毫子,我唔係使公眾錢,我唔係公眾人物,我無義務要去應酬你哋(指傳媒),啱唔啱先?不過呢次我真係想澄清番,我冇爭人錢,欠債要還,我有『還評報告』(還款能力評估報告),我係白豬仔嚟㗎!」至於為何俾人追債,能否提供澄清證據,容父繼續火滾:「我有啲嘢要 settle,我而家都唔敢落街,坦白講我隻腳都唔方便,斷咗韌帶行都行唔到!如果我整親,我要搵我個女,我使乜排醫院排咁耐呀?」言談中,間接指自己同天后女兒毫無軱轕。

提到女兒的「斷親論」,容父覺得經理人霍汶希要負最大責任。「我唔係要攻擊我個女,但係佢經理人講嘅嘢係不盡不實,佢(祖兒)無同我還過債,亦無俾過錢我做生意,我所有做嘅生意,都係我自己搵返嚟嘅錢,我蝕都係蝕我自己嘅錢。(事後 Joey有冇搵過你?)冇,我都冇搵過佢,我好多年冇見過佢,我都唔知有咩得罪咗佢?唔緊要,你咁大個人都要有番你思想,有你嘅諗法,你認為呢個爸爸唔見唔緊要,我冇期望過你要扶持我,你今時今日飛黃騰達,我有我生活,你有你嘅忙碌。

追債街招貼通街,經理人霍汶希為祖兒同父親撇清關係,惹來對方不滿。

容祖兒演唱會密密開,為自己搵落不少磚頭資本。

70多歲容祖爺退休後,要在太子遊戲機鋪打工賺生活費。

07年容祖嫲林慧貞在超市偷竊,容錦輝護母心切恐嚇超市保安,鬧上法庭。

(《蘋果日報》圖片)

「我啲老人家全部唔敢落街,嚇到佢手騰腳震,我而家唔係殺人放火,我都話咁多年,容祖兒出道以嚟,我無做過任何嘢丟佢架。我唔係咩十惡不赦嘅人,我屋企窮啲啫,我段婚姻唔好啫,我唔係做過咩危害社會嘅嘢,俾啲空間我屋企人吖!」

無見十年

至於有關他欠下爛賭債三十萬,甚至親自煲湯氹女的報導,容錦輝在電話中咆哮:「我阿媽話再見記者佢會自殺!又話唔想個仔同個孫好似鬧交咁樣!三十萬?佢點知我爭佢三十萬?我爭三十萬都知?佢(傳媒)好似瞓喺我隔籬!我爛賭?×!簡直黐線㗎!你可以喺我隔籬屋,求其問一個人我賭唔賭錢嘅!

「又話我煲湯上佢屋企?唔好玩啦,大佬!如果講到前妻,我起碼十年未見過佢啦,識我嘅人都知我唔識煮嘢煲湯××寫到實牙實齒!唔好斷章取義先得㗎!(指欠稅二千多元)我交六萬幾蚊稅,嗰二千幾蚊係罰款嚟㗎!」

容錦輝一再強調,手上有證據可以還他清白,並會現身交代被指欠債的傳聞,但直至本週二(十一月四日)黃昏,容錦輝以需要「 cool down」為由,未有為事件作出澄清。

母親余金鳳陪容祖兒捱上成名之路,連同胞弟一家三口關係要好。



拍拖兩年半,劉浩龍的容祖兒男友身份逐漸被肯定,甚至將名下的百萬波子坐駕給對方代步。

週日同母親外出撐枱腳,容祖兒黑面避談父親欠債事件。

容祖兒名下二億六的磚頭,當中包括三個市值億五的跑馬地松柏新村單位。

密友關月茵投資眼光獨到,容母將女兒的投資重任全權交託對方。

錢作怪

容父容錦輝屢傳欠債,更不時惹禍上身,難怪容祖兒要同生父劃清界線。

借糧失蹤

00年,容父被踢爆向當年任職的美國安泰人壽保險公司,借糧七萬多元後失蹤,保險公司曾登報追討,最終由 Joey孭起欠債。

欠薪俸稅

02年,容父被稅局入稟區域法院,追討總額 3.9萬元的薪俸稅及暫繳稅, 99年,他亦曾被稅局追收 1.4萬元的欠稅。

刑事恐嚇

07年, Joey祖母林慧貞被指在超市偷香口珠,容父趕至催促職員放人,更揚言要搵人搗亂超市及斬人,最後被判刑事恐嚇罪及 160小時社會服務令。

反口加價

10年,容父自組的車行被投訴,客人落大訂後,容父反口加價不賣車,根據合約承諾,車行要全數退訂,但容父卻以病、周轉不靈、假期銀行閂門等藉口拖足三星期,遲遲無錢還。

斷六親

雖然講錢失感情,但為錢銀搞到六親,何必呢!

張學友

93年,張學友哥哥張學智,在澳門欠下 500多萬賭債,張學友慘被勒索,雖然他有出手代兄還清巨債,但學友事後公開表明「絕無下次」。

張衞健

身為張衞健細佬兼經理人的張衞彝,去年公開指責阿哥趁自己患上抑鬱症期間,轉移他所有資產,並將他放逐到大埔舊居,禁止母親跟自己見面。後來張母遇溺入院,兩兄弟到醫院探訪時,亦面左左如陌路人。

林嘉欣

12年,林嘉欣母親被指騙去一名上海留學生 40萬加元(約 300萬港元),對方報警求助,事後林嘉欣立即劃清界線,更揚言「唔想理咁多!」

李香琴

96年,李香琴胞弟李樹佳,在澳門賭錢欠下 300萬賭債,李香琴代他償還,但後來對方死性不改,李香琴決定登報與他脫離姊弟關係。

大字報

容父被人追債,禍及容祖兒,其實過往亦有唔少圈中人,因家人欠債,搞到自己一身蟻。

張栢芝

99年栢芝初出道,父親「鬍鬚勇」因欠下千萬巨債,有人發出江湖姦殺令,逼栢芝代父還債,去年 1月,「鬍鬚勇」再被追債 200萬,在中環及灣仔貼上巨型大字報,張栢芝再被拖落水。

洪欣

12年尾,洪欣遭從事「疊碼仔」的老豆拖累,被澳門賭廳發出江湖追數令,四處張貼有洪欣照片的欠債大字報,逼洪欣代父還四百多萬的「疊碼數」。

陸詩韻

去年被指泊到好碼頭的陸詩韻,原來男友 Jeffrey(吳銘偉)是空心老倌,欠債纍纍,債主更在女方匡湖居寓所外,圖文並茂貼上 14張追債大字報及二人的照片。

陳秀雯

08年,債務纏身的陳秀雯和前夫林國雄欠下債主 93萬,被財務公司分別於太子道寓所及大埔亞視片廠外張貼「欠債還錢」大字報。



鍾意就快D Share啦!