掃呢頁CODE去手機

2014年11月6日 星期四

[壹週刊 - 1287] 紅色娘子軍殺到 M1,




爆壹爆

紅色娘子軍殺到

中國大媽行為一早名震全球,佢哋可以不理旁人目光大叫大唱,早排班大媽更來到壹傳媒門外圍堵,晚晚高聲咒罵「黎胖子」,真係聞者心驚,聽者流淚。

呢班大媽圍蘋果,另一班打扮成紅色娘子軍嘅中國大媽,就浩浩蕩蕩操到海洋公園,哇,幾十歲人仲短褲象襪咁扭腰跳舞唱紅歌,唔知嘅仲以為萬聖節出新招「人嚇鬼」。由於佔中運動仲繼續緊,呢班紅色娘子軍公然殺到大唱我愛共產黨,搞到在場人士以為係反佔中行動升級,將海洋公園就地赤化。

奇裝異服不特止,呢班大媽仲貫徹佢哋強國人驃悍作風,四圍蹲下乘涼,大聲叫嚷之餘,仲興之所至,隨時又再高歌,強迫人睇佢哋表演,咁鬼核突,對眼都唔知望去邊先叫有條生路。真心希望中國旅遊部門教育吓,大媽出國後,唔好周圍發花癲啦好嗎?

呢班紅色娘子軍,真係得佢哋

有胃口,隔籬其他人就冇啦。

旺角搞笑 V煞

肥版 V煞,自己創作。

上週末萬聖節,旺角佔領區班後生仔都有新創意,除咗好多人將「我要真普選」黃紙貼在額頭,扮道長趕殭屍之外,另外最多人扮嘅就係 V煞,搞到成個旺角都係 V煞人。 V煞其實係來自一套戲,指反建制嘅自由鬥士,電影中嘅經典對白:「人民不應該怕政府,應該是政府怕人民!」及「面具下是一種思想,思想是不怕子彈的。」真係好適合呢場無領導的反專制運動。

不過呢日最好笑係一名少女,因為買唔到 V煞面具,竟然拿日本公仔面具來改裝,然後畫上眼耳口鼻,可能佢自知畫到不倫不類, V煞面變成包包面,仲詼諧到似日本能劇造型咁。不過難得佢有心,仲在面具上寫明「 V煞」二字,費事其他人睇唔明佢個面具係搞乜。爆哥同佢吹咗兩句,佢話支持佔旺及要求真普選,但家人則反對佢落旺角佔領區,唯有趁萬聖節出來蒲時,扮 V煞來支持佔中運動。

王晶真心反佔中

網絡潮文中有左膠、右膠,仲有一句叫「真心膠」來形容有唔同強烈政治傾向嘅人,呢排娛樂圈當中最積極反佔中,就當然係王晶,佢除咗喺微博上 Unfriend黃秋生、杜汶澤、何韻詩等支持佔中嘅藝員外,仲叻到上中央電視台大講反佔中,返到香港又出席藍絲帶運動幫李偲嫣站台,有人話佢因為農曆年前有戲要上,但因為發哥早排支持學生,為免套戲被大陸禁演所以高調反佔中。但爆哥識得佢身邊朋友,話佢其實係真心反佔中。

話口未完,佢又接受廣東南方報系嘅人物周刊訪問,繼續反佔中,仲話退休之前都會積極參與反佔中活動,佢反對嘅理由,無非都係擔心香港社會被破壞等等。雖然話論點老生常談,但佢嘅訪問就喺大陸引起好多人關注,原來,大陸政府一早落了禁令,不論佔中還是反佔中消息,只能由新華社和中央電視台發布,以免影響國內人思想。但王晶個訪問一出,大家都眼前一亮,透過佢訪問中仔細描述香港人點樣唔理禁令照樣佔領街道等行為,大陸讀者反而曲線知道香港佔中實況,於是又引發私下討論,聽聞大陸人仲分為支持和反對兩派,各有一半人。呢個結果,真心反佔中嘅王晶,又真係勢估唔到噃。

呢個字幕係藍絲帶加㗎。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!



鍾意就快D Share啦!