2014年12月5日 星期五

[忽然1周 - 1010] 蘇康結婚 送希望小學俾老婆 MW,




蘇永康 47歲,太太馮翠珊 38歲,係時候開行 turbo生 B呢。阿公鬼馬咁話:「設唔設(防)好呢?老婆。」仲問?做嘢

媽咪姐

蘇康結婚 送希望小學俾老婆

走過千山萬水,人稱阿公嘅蘇永康,終於喺周二( 2日)同拍拖 8年嘅 Alexander McQueen亞太區總經理女友馮翠珊( Anita)拉埋天窗!其實 03年離婚嘅阿公,曾經諗住唔再結婚,難得 Anita話唔介意,結果行吓行吓,終於修成正果。媽咪姐真係戥佢哋高興呀!









睇呢次婚禮就知蘇康人緣真係好到無得頂,仲好錫老婆㖭。首先樂壇天王天后排隊到賀已經係威!賓客仲多到要喺尖沙嘴洲際酒店開 50圍先坐得晒。再睇下新娘子着住百萬婚紗,全身啲珠寶首飾閃到爆,恨死唔少姊妹呀!蘇康仲話:「今朝接新娘,自己都嚇一跳!唔知阿媽準備咁多家當做禮物。」

14人星級兄弟團喺洲際外面 chok住影相,有氣勢!但至威都係蘇康俾咗張無填銀碼嘅支票俾姊妹做開門利是,仲話:「佢哋會錫住我嘅。」

新娘子係 Alexander McQueen高層,出門都着番品牌價值$28,000嘅紅色 tube dress代替裙褂。不過最搶梗係手上嗰啲勁粗龍鳳鈪同鑽戒啦。

晚宴入場嗰陣,新娘好開心咁同賓客打招呼,反而蘇康好似有啲緊張,捉實老婆隻手。

湖南建校

蘇康結婚後,黃偉文係網上爆佢以太太名義捐錢,喺湖南漣源市起希望小學。一班網友都讚蘇康好浪漫。

不過呢,媽咪姐覺得蘇康最有心嘅,係佢偷偷哋籌備咗好耐,捐錢返內地湖南,以老婆馮翠珊個名起希望小學,齊齊做善事。正如佢哋嘅老友黃偉文所講,呢份真係送給最深愛的人最佳禮物!咁錫自己,又咁有愛心,呢啲老公邊度搵吖!

勁過台慶騷

當晚由有線主播區永權做司儀,太極嘅 Joey Tang上台組 band, Sammi高歌〈終生美麗〉,一對新人又叫 Eason唱〈愛是懷疑〉,之後一班歌手輪住上台唱。

婚宴上嘅重點環節拋花球,繼續造馬咁造,由容祖兒獨得。粒粒巨星,節目咁豐富,好睇過台慶喎。

歌神景點

平日低調嘅張學友,難得嚟飲,即刻同陳奕迅一樣,成為場內賓客嘅集郵景點,連神嫂徐濠縈都集埋一份!

酒後最爆

飲宴之後,明星醉態都係焦點之一。不過今期最爆一定係好得戚嘅君如。爆唔爆,唔一定睇面,睇埋件衫呢!

說好的世紀合體呢?

王菲無影

早前,盛傳霆鋒會帶王菲出席蘇康婚禮,造就 3 pair樂壇愛侶世紀一聚!點知,霆鋒一落機聽到記者提王菲就笑住話:「係咪未俾人批踭打過呀?」最終佢單拖去飲,見到傳媒仲有啲驚青。放心,記者係唔會批你踭個喎。

Sammi唔拖

婚宴後,喺銅鑼灣有 after party, Sammi同安仔飲到醉住走。 Sammi死都唔肯拖安仔隻手,但其實一路用眼尾瞄住面都紅晒嘅安仔,仲行先帶路。

Joey可能估唔到一落樓會見到咁多記者,即時起跑。一路跟住佢嘅劉浩龍醉醉哋,反而好淡定。不過, Joey一坐上車,個人定番,就同記者揮晒手 say bye。係咯,拍拖開心事嘛。

Joey變臉



鍾意就快D Share啦!
Related Posts Plugin for WordPress, Blogger...