2015年3月20日 星期五

娛樂圈最幸福的男人 [忽然1周 - 1025] MW,



靚抽王

娛樂圈最幸福的男人

唔好搞錯,我娛文樂作為一個思考偽術家,慣咗用「逆向思維」諗嘢,所以呢度講嘅「最幸福」,唔係父慈子孝家有嬌妻嗰種,我認為咁樣唔係最幸福嘅。作為一個男人,最幸福莫過於做錯事,奉旨有人原諒同幫手揹黑鑊以下就係近年最幸福嘅三大猛男,佢哋有乜咁巴閉?睇過。







第一位 彭順

作為排行榜第一位,梗係唔止衰一鑊咁少啦。 07年被影到同模特兒 Kama到酒店房短敍,去年同小三 Liddy當街咀嘴,到前幾日喺泰國曼谷夜店同低胸女親熱飲酒。根據非正式統計,凡係有中國人嘅地方,都有點心食,而凡係有花天同酒地嘅地方,都有彭順出現。而每次彭順做錯事,妻子李心潔都會一次又一次原諒同信任。加上佢同前妻生咗個女,都有現任妻子李心潔幫手照顧,所以佢除咗係賤男第一位,佢都係幸福男第一位嚟㗎。

第二位 吳浩康

佢早年藏毒被捕唔係重點,近日被發現背住女友鍾舒漫同小三去街街親熱,都唔係重點。重點係,無論佢做過幾多錯事,女友換完一個又一個,都仲有人肯做佢女朋友!係囉,吳浩康究竟有乜三頭六臂?定還是佢有啲好犀利嘅優點係得佢女友先知,我哋係唔知?答案係:冇!思前想後,我都認為佢係純粹好命,唔係點會得到最幸福男人第二位?執到啦你!

第三位 房祖名

有個會原諒自己嘅老婆,當然係幸福,不過有個會無限支持自己嘅老竇,亦都係相當美妙嘅事。住大屋唔使愁,一出道就有歌唱有碟出,有戲拍做主角,然後衰喺毒品手上俾人捉,都有老竇救駕,坐半年出嚟過情人節,出監後有老竇幫你鋪路去外國讀電影。最盞鬼嘅係,無論佢做錯乜,都可以同大家講,係因為老竇太忙冇時間同自己溝通,先至會做錯事。另外我哋發現,做錯事抵賴原來係基因嘅一種,係有遺傳嘅。

最 XX

每期分析行事最誇張嘅人物(例如最賤、最大使、最口臭等)並排出當中的三甲位置,食花生之餘,叫做為世界維持吓正義咁

鍾意就快D Share啦!
Related Posts Plugin for WordPress, Blogger...