掃呢頁CODE去手機

2015年4月15日 星期三

金像獎民選影帝 青雲冇得輸 [FACE - 412] 青雲,劉青雲,MF,



全知言

金像獎民選影帝 青雲冇得輸

星期日( 19日)就係第 34屆香港電影金像獎,今屆最緊張當然係影后之爭,由《雛妓》阿 Sa大戰《親愛的》趙薇,至於影帝有劉青雲憑《竊聽風雲 3》及《暴瘋語》兩個提名成為大熱!「最佳電影」就五套都好平均,冇乜邊套係贏梗喎!今期《 FACE》問了不少明星同街坊心水,影帝幾乎大比數投劉青雲,真係贏硬咁款喎!

馬德鐘最愛周迅

咁啱我睇咗《香港仔》,所以揀呢套做「最佳電影」;「最佳男主角」就揀吳彥祖,因為劉青雲攞過好多次,而吳彥祖都付出咗好大努力,應該要有鼓勵;而「最佳女主角」係周迅,呢個係我個人喜好!

最佳電影

《那夜凌晨,我坐上了旺角開往大埔的紅 VAN》

《香港仔》

《黃金時代》

《親愛的》

《竊聽風雲 3》

最佳男主角

彭于晏《黃飛鴻之英雄有夢》

劉青雲《暴瘋語》

黃渤《親愛的》

吳彥祖《魔警》

劉青雲《竊聽風雲 3》

最佳女主角

吳君如《金雞 SSS》

湯唯《黃金時代》

周迅《撒嬌女人最好命》

趙薇《親愛的》

蔡卓妍《雛妓》

可嵐 青雲最實力

「最佳電影」方面,我睇過又最鍾意嘅係《竊聽風雲 3》,如果拍得唔好都唔會出到第三集我知「最佳男主角」有好多靚仔候選人,不過我自己比較欣賞實力派,同埋細細個已經睇劉青雲嘅戲,所以揀佢而「最佳女主角」名單上個個都演技超卓,不過《雛妓》入面個角色係好難演譯,所以:「阿 Sa我支持你呀!」

姜文杰 君如夠百變

「最佳電影」我一定支持爾冬陞,所以我揀《竊聽風雲 3》;而「最佳女主角」方面,吳君如係好突出,佢好百變,角色又多元化;「最佳男主角」就支持心目中嘅黑馬王子,劉青雲,你快啲攞獎

Jeana 睇 8次《親愛的》

我嘅「最佳電影」心水係《親愛的》,呢套戲我睇咗 8次,好有感覺,又不停介紹朋友睇!選角揀得好好,同埋可以帶出中國嘅社會問題,所以係一套好好嘅電影!「最佳男主角」心水係劉青雲哥哥,因為佢係我嘅超級偶像,我鍾意佢演戲有好多層次,所以支持《暴瘋語》入面嘅佢!而「最佳女主角」會揀趙薇,佢真係做得好好,可以為套戲豁出去,尤其係化妝,可以做一個鄉村女人做到淋漓盡致,好佩服!

街坊撐阿 Sa做影后

阿康

「最佳男主角」揀劉青雲;「最佳女主角」揀周迅,因為佢啲戲本身都好出神入化,好投入;而「最佳電影」就會揀《竊聽風雲 3》,各方面都好出色!

梁生

「最佳電影」揀《紅 VAN》,之前喺高登一直有睇開,拍成電影都好期待;「最佳男主角」揀劉青雲,有睇開佢啲戲,都好好睇;「最佳女主角」支持蔡卓妍,因為聽聞佢今次做《雛妓》幾好睇!

梁小姐

「最佳電影」揀《紅 VAN》,因為幾好睇,同埋淨係睇過呢套;「最佳男主角」揀《竊聽風雲 3》劉青雲;「最佳女主角」揀阿 Sa,佢喺戲入面同平時好唔同!

鍾意就快D Share啦!