雷頌德十分疼錫囝囝，雖然大仔雷鳴患有自閉症，但 Mark仍花大量時間陪伴，又教佢適應社會，絕對係一個好爸爸。
真面目
執輸 抄得歌多 雷頌德𦧲拍《爸爸 3》衰咗
強國錢易搵，港星北上拍劇隨時賺層樓，加上一條龍接埋廣告代言商演騷錢，條數咪話唔襟計！
內地節目《爸爸去哪兒》連續兩季都勁高收視，帶挈一班爸爸同寶貝爆紅，第一季的林志穎 Kimi父子靠《爸爸》效應狂賺 2千萬，計埋電影版分紅同節目片酬，分分鐘搵半億！據知身為兩子之父的雷頌德，對節目非常有興趣，主動約劇組見面，不過最後因抄歌形象唔好叮出局。
學千嬅話齋：「個仔唔係攞嚟賣！」不過既然父子檔出鏡可以收高一大截片酬，梗係𦧲咗先係賺唔到啫家陣！
45歲雷頌德有份捧紅天后陳慧琳同天王黎明，不過近年工作量不及當年，間中先有得做唱片或演唱會總監，要養起一家五口實在唔容易。
溫情牌失效
眼見人仔易搵，雷頌德一直希望可以打入內地市場。做唔成《我是歌手》呢類音樂節目，雷頌德於是向綜藝節目埋手，打算以好爸爸形象參加第三輯《爸爸去哪兒》。
勁恨打入強國
育有 9歲大仔雷鳴及 4歲細仔雷響（另有老婆與前夫生的 17歲兒子），雷頌德早前主動約見湖南衞視劇組人員，自薦參加即將開拍的《爸爸 3》。雖然雷頌德大打溫情牌，向劇組表示大仔雷鳴患有亞氏保加症（即高功能自閉症），不過劇組認為雷頌德有唔少抄歌新聞，形象唔夠正面，加上在內地知名度不足，拒絕邀請雷氏父子上節目。
張晉接棒
𢱑撈失敗，雷頌德周圍向身邊人呻唔抵，又繼續放風表示非常恨上《爸爸 3》，希望劇組回心轉意。本刊致電雷頌德，但至截稿前仍未回覆。
不過節目監製謝滌葵早前已確認新一季目標，明顯冇預雷頌德。反而接觸了多個在內地知名度更高的藝人，包括劉燁、鄧超及韓寒等，而香港代表則未有定案。
有傳劇組未放棄力邀張智霖及謝霆鋒父子，不過兩人加盟的可能性較低，所以同時向張晉埋手。雖然張晉在國內未算一線，不過蔡少芬自《甄嬛傳》後極受強國觀眾歡迎，隨時能以「蔡少芬老公」之名搵到條大水喉；而張晉亦承認同劇組傾緊，極有可能帶 4歲大女張楚兒上節目！
斟唔掂
有傳湖南衞視由第一季開始已想搵謝霆鋒同 Lucas上《爸爸去哪兒》，但霆鋒唔想囝囝出鏡，寧願有錢都唔賺。
去年傳出劇組以 1,500萬高價力邀 Chilam同魔童參加《爸爸 2》，當時 Chilam一口拒絕，盛傳製作單位今季加碼至 2千萬，另加電影版片酬，希望 Chilam應承。
雷仲抄
疑似抄歌，幾乎每個音樂人都試過，偏偏雷頌德中招次數特別多！由 98年黎明的〈眼睛想旅行〉及〈 Happy 2000〉，被指抄 Cher的〈 Believe〉及韓國樂隊 H.O.T的〈 Candy〉； 00年為陳慧琳作的慢歌〈過份〉，則涉嫌抄襲日本歌手椎名林檎的〈石膏〉；由側田主唱的〈決戰二世祖〉，就似 Akon的〈 Lonely〉； 06年衞詩〈 Funny Jealousy〉，又與美國女歌手 Vitamin C的〈 Graduation〉撞；至於 07年古巨基的〈錢錢錢錢〉，更被高登仔二次創作成〈抄抄抄抄〉，可見雷頌德抄歌形象幾咁深入民心！
|
鍾意就快D Share啦！
|
|
|
