只見兩人好快就投入情深互望，然後陳凱琳主動傾前，閉起雙眼獻吻，全程冇尷尬冇 NG。
封面
唔吼賭王仔 父女戀升級 陳凱琳攬啜鄭嘉穎
45歲鄭嘉穎同 23歲陳凱琳爆出暗撻兩個月，陳凱琳更拍得送上門，男方解話只係上屋企借碟，兩人雖然例牌否認，但上週五（ 10日）鄭嘉穎同陳凱琳一場咀嘴戲，深情一吻卻非常投入，又攬又啜顯得非常自然。
早前鄭嘉穎已傳出同細佢一截嘅陳凱琳（ Grace）因為拍《殭》而撻着，雖然同劇嘅陳山聰同黃又南出盡法寶搶女；而同一時間，去年 12月在 Moiselle的活動上，賭王仔何猷亨認識了 Grace，雖然強烈攻勢，但又點夠成熟又係視帝兼日對夜對拍感情戲嘅鄭嘉穎爭吖！
上月底陳凱琳和鄭嘉穎一齊出席完灣仔會展嘅影視博覽後，男女方前後腳走，轉個頭又前後腳喺鄭嘉穎位於大坑嘅豪宅會合，短聚咗差唔多兩個鐘頭又一齊坐車返將軍澳電視城開工，你話冇嘢都冇人信！
一切由借碟開始
事後果然兩人夾晒口供，鄭嘉穎仲大讚 Grace好上進：「 Grace好上進想睇多啲戲，咁小弟 DVD存貨多，咪叫佢嚟我屋企攞。」講到發展機會就開晒閘：「乜嘢都係由朋友開始，年紀唔係主要考慮因素， timing同溝唔溝通到好重要！」又補充：「發展機會我又唔可以講得咁死，大家只係朋友，未開始你就嚇親人，小弟真係要孤獨終老。」嚇親都俾你冧番晒
拍 kiss戲好自然
當然戀情曝咗光，《殭》都 must go on嘅。機會嚟喇！上週五（ 10日）鄭嘉穎同陳凱琳就要喺薄扶林道拍攝一場咀嘴戲，拍之前 Grace個樣已經好冧，雙眼向鄭嘉穎狂放電，然後雙手攬住鄭嘉穎後頸，雙眼微微閉起，慢慢嘴對嘴，一啲羞怯嘅感覺都冇。兩人攬啜表現自然，導演收貨，不過因為想拍多幾個角度，兩人拍得好投入，好快就搞掂。
鄭嘉穎嗒晒糖
之後等埋位拍其他 shot時，鄭嘉穎亦冇冷落 Grace，一直陪住伊人談心，有講有笑，睇嚟嘉穎唔使驚孤獨終老喇！
早前 Grace爸爸曾回應女兒並無拍拖：「佢𠵱家都冇話拍拖，等佢自己揸主意啦。」又稱同嘉穎唔係好熟；而週一（ 13日）本刊在 Grace又一村住所外訪問陳爸爸，佢只係話：「辛苦晒你哋！」女大女世界，搞出個「父女戀」，真阿爸都管唔到
賭王仔 VS 視帝
何猷亨
21歲，賭王何鴻燊第四房次子，咬住金鎖匙出世，在英國讀完工商管理。現時擁有 4間公司，市值億億聲！最近首度擔任保良局總理。
曾經同英國劍橋大學富家女陳可欣（ Sabrina）拍拖， 12年分手。
鄭嘉穎
45歲，美國出世， 16歲參加新秀歌唱比賽但中途退出回美國繼續升學，其後回港簽約寶麗金做歌手。曾在香港及東南亞等地奪得 4項視帝。
嘉穎情史一籮籮，但都唔太長久，最長要數拍拖 5年的周麗淇。
專溝拍檔
鄭嘉穎入行 22年，傳過嘅緋聞真係好多，仲要好易同拍檔撻着喎，而且同陳凱琳嘅緋聞一樣都係死口唔認，係時候回帶喇！
|
鍾意就快D Share啦！
|
|
|
