天然呆變奏 馬明染金毛扮韓仔 chok晒！ [FACE - 412] 馬明,馬國明,MF,

《為食神探》一睇就知係喜劇，所以不時見到馬明有啲誇張表情，不過好似天然呆自然啲喎！

貼圖區

天然呆變奏　馬明染金毛扮韓仔 chok晒！

大台最叻就係「抄」，見韓風繼續吹，一於叫班小生勁扮韓仔 look，繼上次《名門暗戰》要黎耀祥、曹永廉等中坑梳韓仔頭後，今次就叫出名「天然呆」嘅馬明扮韓仔，喺新劇《為食神探》一改以往薯 look，除咗染金髮外，劇組仲安排唔少韓仔衫畀佢。上週二（ 7日）劇組喺牛頭角取景，講馬明飾演街邊手機收買佬，淺藍褸、純白吊腳褲加懶佬鞋勁 chok，連 41歲馬明自己都覺正，「咁大個仔第一次染金毛，啲衫今次係公司全新買，我都覺好靚。」

新劇更會與一眾女神黃翠如、岑麗香、黃心穎和朱璇有感情戲。馬明話：「開咗一個星期工，已經同翠如、香香好 friend，應該之後愈嚟愈熟㗎。」似乎好冧香香喎！咁多靚女陪開工自然醒神，所以馬明當日表情多多，連招牌表情「天然呆」都出埋。

劇中講馬明做唔成廚房仔，之後跟阮兆祥查案，馬明花恤加白褸，睇落後生咗好多。（網上圖片）

馬明扮韓仔，而好耐冇拍劇嘅黃翠如就喺劇中扮貨車司機，孭腰 bag、踎喺地下再揸住本《古惑仔》，又幾入戲喎！#翠如 BB#貨車司機（網上圖片）

劇中馬明同岑麗香、黃翠如和朱璇都有感情綫，除咗翠如 BB外，兩位都單身，馬明有冇機會拍劇撻着呢？（網上圖片）

真係好少見馬明着呢啲鮮色衫，就算台慶或者出騷都冇見過佢咁着，好彩佢夠高大，扮韓仔都接受到。#韓仔 look#潮馬明（網上圖片）

係咪好殺死人呢？見到記者採訪，馬明仲識 chok㗎，但個髮型好似鬆咗少少喎！#馬明 BB#chok

當日馬明扮手機收買佬，不過着粉藍褸、吊腳褲加懶佬鞋，街邊有咁型嘅收買佬就好喇！

馬明招牌表情「天然呆」當日亦有出現，佢做呢個表情真係最傳神。#天然呆#招牌樣

鍾意就快D Share啦！

下一篇 》