熱爆娛樂: 億元買校網樓　趙薇谷女入名校 [壹週刊

2015年5月21日星期四

億元買校網樓　趙薇谷女入名校 [壹週刊 - 1315] 趙薇,M1,

探熱針

億元買校網樓　趙薇谷女入名校

半臂力唔使，便將港姐葉翠翠手上的內地富商黃有龍據為己有的趙薇，婚後一年即在新加坡誕下女兒黃新（乳名：小四月）；五歲的「小四月」下年夠秤入小學，剛宣傳完新劇《虎媽貓爸》返港的趙薇開始帶住寶貝女四出撲，並鎖定九龍塘一帶的名牌國際學校。據知，趙薇為讓寶貝女順利入學，更準備在 41校網區一帶落手，入市買豪宅。

睇中九龍塘耀中

憑住電影《親愛的》初奪香港電影金像影后的趙薇，電影、劇集、廣告，長期做到冇停手，已多年冇陪「小四月」過生日，「我好殘忍，她到現在任何一個生日我都冇出現過，我下次一定要請假。」趙薇說。

生日事小，前途事大。「小四月」明年九月將入讀小一，忙爆趙薇亦終於願意放低手頭工作，專心陪寶貝女面試搵學校。

原本鎖定了位於深井的哈羅香港學校的趙薇，一二年同老公以 1.5億購入荃灣皇璧三個複式單位，為入學鋪定路；但最近又突然改變主意，想安排「小四月」入讀出名學費貴的九龍塘耀中國際學校。

「佢聽埋好多意見，話九龍塘啲學校出名好，除咗耀中，仲睇定咗幾間，準備逐間去敲門，哈羅都係佢首選，但學校全英語教學，趙薇驚個女未必應付到。」知情者說。

入股阿里影業短短半年已勁賺 5.89億的趙薇，為求女兒順利入學，更積極在九龍塘校網區搵樓。

愈大愈似媽咪的「小四月」非常活潑，不停在商場奔跑。

近日趙薇同寶貝女「小四月」長駐香港，四出到各大名牌小學面試。

甚少公開亮相的黃有龍，不時在微博發放一家三口的全家福。

上月中，趙薇為小四月訂製公主蛋糕，慶祝她五歲生日。

今年二月趙薇來港為徐崢的《港囧》客串，並抽空同舊同學黃曉明飯局，順道為小四月考小學做先頭部隊。

忙完為新劇《虎媽貓爸》做宣傳，趙薇終於有時間返港陪女搵學校。

大眼睛似足媽咪

上週六（五月十六日），趙薇帶住「小四月」到 ifc shopping，難得媽咪陪出街，「小四月」興奮到又跑又跳，著住 Moschino粉紅色連身裙配涼鞋的她，似媽咪有對大眼睛，餅印一樣，十分可愛。

兩母女在助手陪同下，在超市掃貨上糧後，先 call司機將戰利品放上車，之後一行人再到四季酒店 high tea，其間戴住口罩零妝的趙薇發現記者，即面露不悅並不斷回頭說：「不要再拍！」又示意「小四月」行快點，避開鏡頭。