探熱針
置身事外 王征匿四季瘟仔
亞視三月底落實不獲續牌，執笠已成定局，午間新聞更宣布停播，數百名員工前路茫茫，但事到如今，「龜縮」王征仍拒絕現身交代事件。據知近年在內地搞地產的他，旗下的榮豐控股有限公司，因賬目不清被內地政府調查，遲遲不肯北上答辯的王征，索性隱身中環四季酒店，得閒就搵亞洲先生陪玩出海飲香檳，繼續逍遙快活。
內地惹麻煩
公司拖糧，股東閂水喉，亞視員工於是自組聲討大會自救，並要求王征現身作出妥善安排，但時至今日，王征一直神隱，只「聲控」執行董事葉家寶解決問題。
「其實王征一直都喺香港，因為佢喺內地惹咗麻煩，所以唔想俾人知佢喺邊。佢喺內地一直有做地產生意，不過公司盤數早排出咗問題，大陸政府要求佢返去交代，但王征拖得就拖，仲為咗避接傳票，已經冇住之前報住嘅地址，搬咗去四季酒店住。」知情者說。
借完再借
據了解，王征自早年購入亞視後，在內地商界開始稍有名氣，他便趁機買地發展地產，不過亞視在他領導下年年虧本，就算王征有本事買入長春地皮，再叫埋亞生亞姐飛去當地拍特輯做宣傳，但長期「缺水」下，根本冇財力繼續發展。
「佢早排問肖建華（有千億庄家之稱）借咗三億，之後又問另一個朋友借咗五百萬，不過到而家都未還晒錢，出面以為佢爛船都有三斤釘，冇諗過追唔番。而家王征長期匿喺四季，就算出面點樣俾人鬧，佢都闊佬懶理，仲有心情叫啲亞生（亞洲先生）去玩，好似今屆亞軍王暢，王征上次出海都有預佢，王暢仲將啲晒肌相 po上朋友圈同人分享，兩個飲香檳玩得好開心。」知情者說。
有破壞 無建設
亞視逾半世紀基業，自 10年王征上場後，被他一鋪清袋，步向執笠困局。
罰款 100萬
亞視誤報江澤民死訊，被指是消息來源的王征即時劃清界線。曾任兩屆全國政協的他，疑因誤報事件被「搣柴」， 13年被剔出政協名單外，之後廣播事務管理局（通訊局前身）開始對亞視展開調查，最終揭發王征干預亞視日常運作，重罰亞視 100萬元。
|
鍾意就快D Share啦！
|
|
|
