王母棒打鴛鴦，令王梓軒跟家燕女石祐珊戀情告急。
探熱針
阿媽唔 Like 王梓軒撇家燕女
兩年前同「家燕女」石祐珊姊弟戀的王梓軒，戀情原本獲未來外母開綠燈，不過日前家燕姐突然轉口風，話自己個女無拍拖。據知，父親是港區人大代表王英偉的王梓軒，家教甚嚴，家人更反對他與圈中人拍拖，加上王母見寶貝仔在劇集《華麗轉身》表現突出，事業開始上位，於是棒打鴛鴦，阻止二人繼續交往，以免大好前途被姊弟戀拖垮。
幫到出面
家燕姐長女石祐珊○九年因為媽咪身體問題，決定離開美國返港長住，之後更做了王梓軒經理人，日對夜對，結果發展出姊弟戀，直到兩年前石祐珊為男友慶祝生日，戀情才正式曝光。
「珊珊覺得梓軒好有音樂才華，雖然男友細過自己三年，但思想好成熟，而且兩個都喺美國讀書，所以特別投契。拍拖咁耐，珊珊成日帶梓軒同媽咪食飯，家燕姐都當正佢係半邊仔。」知情者說。
為撐未來女婿，去年王梓軒出碟，家燕姐不單現身撐場，還引薦對方拍劇集《新抱喜相逢》。
「家燕姐成日同公司班幕後講，叫大家俾多啲機會梓軒，佢自己擔正嘅《新抱喜相逢》，家燕姐就更加主動，開聲叫監製俾個角色梓軒，幫到出晒面。」
掌握行蹤
同女友感情穩定，工作上又有未來外母關照，但出身富貴的王梓軒，原來一直被王母反對他與圈中人拍拖。
「梓軒簽嘅唱片同經理人公司係爹哋打本開，阿媽就做幕後軍師，佢對個仔嘅行蹤睇得好緊，做緊乜全部一清二楚，單獨約會就更加要經阿媽批准。梓軒媽咪都覺得家燕女幫到個仔嘅事業，所以就算反對，都盡量隻眼開隻眼閉，只係試過响家燕姐面前暗示話唔想個仔咁早拍拖。」
化為烏有
直至《華麗轉身》出街，有份演出一角的王梓軒開始多人留意，王母認為寶貝仔將有大把機會，於是出手，棒打姊弟戀。
向家燕姐求證石祐珊與王梓軒的戀情被拆散，她推得一乾二淨，將戀事化為烏有。
「其實一直都唔係拍拖，佢（石祐珊）係梓軒經理人，最初我以為呢啲新聞，寫幾次就唔再寫。」
至於跟王家關係，家燕姐強調梓軒父母對珊珊好滿意。
「唔關屋企事，（梓軒）佢爹哋媽咪都有問過我（拍拖），我話我睇就唔係囉！只係報導講啫！珊珊 connection好好，外國好多公司搞騷搞 event都會搵佢幫手，梓軒父母都覺得珊珊幫到個仔嘅事業。」家燕姐說。
|
鍾意就快D Share啦！
|
|
|
