豪語錄
邊個李克勤？ 李克勤
沒有人比他更撞名。
克勤是議員——個 gag熟到爛了，連官方公函都寫錯；同為政界，新聞甚至曾報過「總理李克勤」。
直頭同名同姓的，李克勤也是風水家，繼承父親林真（筆名）的衣鉢。
又一位李克勤是學者，著作有《古代漢語詞匯學》。
並非以上界別愈來愈明星化，倒不如說歌手 Hacken愈來愈似個社會改革家，由環保的《天水•圍城》唱到中港共融的《北京北角》，揚棄情歌王子金漆招牌。
他亦像個看透天機的大師。「試過有人話我寫的運程書不準確——並非講笑玩嘢，佢真係以為我兼埋。」
謹慎言辭，他規行矩步得像個書生。
偏偏愈來愈唔似明星囉。
曲
說李克勤唔似明星，是生活化得不出所料。訪問由上午開始，反正八點鐘張羅完孩子返學，而早開工又可早收工陪仔？這天（五月十四日）有些睡未醒——睇咗祖記對皇馬？他問我點解樣樣估中晒，同樣住家中佬自然明，睇波已算夜生活。
唔講波就講歌。譚詠麟為他作曲監製《你最重要》。「阿倫話我一向風格太穩陣，可以嚟刺激啲。『左麟右李』也如此，阿倫的構思很前衞，我就負責保險地拉住他一把；但今次我全聽他的。
「校長四十周年演唱會前夕，搭𨋢時問我：『首歌練成點？嗱要咁咁咁……』我好自然以為他指我擔任嘉賓唱嗰首，原來他問的是《你最重要》；原來，他到那時刻仲係關心我多過自己個 show。」
多年前《豪語錄》專訪他們經理人張國忠，張衝口而出：「根本係兩師徒。」說穿了也不誇張，偏偏兩人從未公開承認。
李克勤這天說：「師徒反而簡單咗， more than，阿倫話過係我 A貨老豆，已經去到介乎父兄之間的關係。」
情誼固然令人動容，但，被大路如譚詠麟都嫌穩陣，又視譚詠麟為前衞，在在反映出李克勤堪稱保守黨黨魁。
「首新歌幾特別，坦白講，會否特別到嚇你一跳呢？不可能，大家知我份人。」拿他沒法子，老實得連丁點娛樂無窮也自絕。
「這市道之下，首先要對公司交代，翻唱玉置浩二那種，銷路有保障嘛，我通常只留一部分給自己試新嘢。」
詞
口中的新，主要指歌詞內容。
「近年很少自己填了，但相熟的填詞人會順着我心態去寫，心態上，《不再少年時》（他青葱歲月的愛情劇）了，推出《嫲嫲》，不只歌頌母愛，觸及老人失智症，有時都驚沉重，但冇辦法，年齡令我不好意思情情塔塔，『大會堂裡邂逅』，哈『蟹后』，人大了諗嘢實際，我現在諗起蟹公定蟹乸好食——你更記錯《大會堂演奏廳》講文化保育？就係囉，連聽眾對李克勤的想法都成熟了。」
民建聯有劉華（劉江華）有克勤（陳克勤），不解也明，大眾寧願由兩位真身從政，於是潛意識下成日噏錯「李克勤議員」。政界嘛，他說：「終於出了個大粒到唔敢攞嚟玩的。」才不是， TVB新聞一樣報過「總理李克勤」……
無處不在，還是風水師。
「真係有人搞錯呢——你說因為我愈來愈似個智者？做咗咁多年人，總有些想法，其實我在意的是民生多過政治。」
濫好人事事關懷，一樣會出事，和 Wyman合作的《北京北角》便被指河蟹、粉飾中港共融。「畫面處理得不小心。 MV導演想出來解釋，我話只可以匿埋扮鵪鶉，那時搭正七．一，好敏感。
「網民力量大，不只創造力，是先要避開他們的破壞力，少少差錯可以連鎖反應。」
於是他咬文嚼字像語言學家李克勤。
「和容祖兒搞 show，叫什麼名要一再篩選，否決了的不妨提提，例如 Affair——出軌，幾貼切吖，我和她來自互相競爭的公司可以走在一起，都算出軌。但最終不敢採用，無謂引起壞聯想。」
辛苦啊！我諗起羅文與甄妮合唱，而李、容會發生緋聞的或然率，明明更低無可低。
唱
講完曲風、歌詞，講唱腔（三句不離本行）。上期《豪語錄》林敏驄說「潮流興要唔識唱歌嘅」，太悲觀憤世嫉俗了，但的確，有人嫌李克勤技巧純熟到悶。
「我都聽過這類批評。 Eric Kwok勸過我唔使吓吓紮行馬字正腔圓嘅，於是我試試瞓喺度唱。去到尾，唱歌其實似講嘢，尤其大家聽咗我咁多年，不可能認唔出說話個 tone。
「如果你換成在峇里沙灘同我傾偈，話題可以很不同，但人畢竟主要時間面對工作，工作需要形象。陳奕迅形象大情大性，真實有權唔係；李克勤形象保守，真實亦有權唔係。但都不重要了。
「欣賞穩定的人總不會是少數，我必然照顧咗 mass先。」
波
《一生不變》如他名曲的，尚有作為香港最知名的曼聯球迷。
我明知故問了——照計，以前愛曼聯稱王稱霸，上季生死關頭亦有理由戥它肉緊；事到如今紅魔不高不低，還怎麼愛下去？同理，英國首相卡梅倫是阿士東維拉擁躉，更冷了，時逢大選，為聲勢，應該自稱車路士 fans。
「非 die hard球迷，例如女仔、賭波，邊隊當頭起就捧邊隊。我顯然不是。
「表面理由可以答你為了思考。聽羅傑承談他的南華、周文曦談他的晨曦，管理港隊都咁複雜，何況英超？曼聯陪伴着我領悟到好多成敗道理。
「但咁講好扮嘢，根本簡簡單單——曼聯輸波我翳住翳住，曼聯贏波我又生猛啲，就係 enjoy被它牽動情緒的習慣。」
算是他在妻賢子孝生活中自行覓得波瀾了。
「大仔鍾意朗尼，很正路，但唔會因為 C朗離開就藐佢；細仔很早留意費蘭尼，好嘢。」
其實，更在意培養孩子們繼承自己的專一。
「做球迷要一世，如果卡梅倫轉軚，可能連任唔到添。」
他們都是保守黨黨魁。
LET'S GO
李克勤忽然說：「吖，有單料幾特別……」
我幾乎感覺到自己耳朵一聳，心想，他終歸識自發八卦新聞了。
「說來奇怪，近日鍾意砌 LEGO。」
與令公子們一齊玩？我問。
「梗係。」
咁，就冇咩好八下去，因為我完全理解，因為我也像他家有兩個小男孩，親子同樂，晚晚窗台變工場。
克勤若有所失，情況像滿心講個笑話而對方卻聽過 N次——唉，我何嘗不若有所失？件事其實算特別（大男人砌 LEGO），但在我看來竟習以為常，也只怪爸爸做慣陪玩員啊！
不同的是，李爸爸更自得其樂：「 LEGO真係專業，一盒嘢幾百塊 parts一定齊，我從未買過有缺失的，缺失又包換。
「你睇它的說明書，好細心畫得清清楚楚，永冇唔明。
「 Parts愈出愈多形狀和款式，但點變都好，咁多年嚟啲榫位還是接到軌，新新舊舊可以撈埋砌。」
克勤冇收 LEGO錢，我覺得他在講緊本業。
|
鍾意就快D Share啦！
|
|
|
