探熱針
剝完再剝 男一有代價 王浩信又除褲晒底凸雕
現年三十一歲的王浩信，三年前同大兩歲的陳自瑤結婚生埋女，人夫愈戰愈勇，拍《東坡家事》晒人魚線，最近接拍《 EU超時任務》更進一步，除剩底褲凸雕；難得擔正男一，王浩信連剝兩次，繼在旺角大街晒完一次，凌晨時分又封街再凸多鑊，賣大包！
有求必應爭取發圍
一線小生走得都走，大台極缺人的情況下，加上聽話有求必應，去年拍《再戰明天》做懲教官，已經自動波狂操練大隻；拍古裝劇《東坡家事》，在零度下的橫店震住拍摔跤戲露人魚線，爭取關注；令入行十年，長期做二幫的王浩信，有機會發圍。
「公司有一段時間乜都學韓劇，試過叫晒啲男藝人剪韓仔頭，好似黎耀祥、黃浩然全部都係同一個髮型。新 order係騷肌，近呢幾個劇，啲仔都要晒肉，大家為咗唔想出嚟失禮人，唔使開工就去舉重健身，執靚啲個 body。」一名劇組人員說。
作為晒肌中堅的王浩信，上月尾為新劇《 EU超時任務》在鬧市大街大巷著住條底褲埋位，上週二（五月十二日）凌晨時分，又要再剝多次。劇情講做大佬的王浩信被飾演警察的朱千雪和袁偉豪搜身時，專登玩嘢剝褲露底。
肥十磅肌男變肉男
一早已經到達現場的王浩信，等埋位期間先扯煙自拍，直至劇中做他兄弟的楊證樺、戴耀明到齊，三個人舉手扭腰，又打晒拍子扭下身，埋位先練習設計好的動作。
當晚其實只有王浩信要除褲，但導演為免再惹來途人圍觀舉機亂拍影響進度，於是將除褲戲安排到後巷拍攝；王浩信亦只需剝完再著番，不似上次著住底褲孭住雪妮在旺角跑街。
「其實嗰次 Vincent（王浩信）都好尷尬，因為個角色要肥肥哋，所以佢谷肥咗成十磅，周身肉著住條底褲跑街俾人睇住晒，都幾難堪㗎！所以今次就算喺後巷拍， Vincent都同監製要求正式嗰陣搵工作人員截人封街，唔想好似上次咁醜怪。」一名劇組人員說。
有料唔怕晒
男人剝，近年在圈中已成風氣，操弗 body拍戲拍劇，隨時招來商機，拍埋廣告搵多筆，所以有料真係唔怕晒。
許志安
經常同老婆鄭秀文跑步健身的許志安，在剛完成的個唱著緊身褲在台上又跳又唱，再展雄風。
|
鍾意就快D Share啦！
|
|
|
