現年35歲嘅胡杏兒自從上年被爆同夜場老闆Phil拍拖後，杏兒大方公開戀情，雖然拍拖未夠1年，不過杏兒早前已揚言，視Phil為結婚對象，更屢傳婚訊，有傳男友喺馬爾代夫已向杏兒求婚。
今日有周刊指，男友Phil求婚成功，謂兩人五月中已經去咗馬爾代夫預支蜜月，去有私人泳池嘅水上獨立屋享受二人世界。報道更指，平時杏兒講親感情事多數會話暫時以事業為重，之不過呢，近日佢就有啲轉口風，暗示自己有機會隨時閃婚。
報道仲話，有傳杏兒同男友Phil將於今年12月結婚擺酒，男友Phil已經叫晒一班多年嘅舊同學，預年尾做兄弟；杏兒亦預咗圈中嘅「胡說八道會」助陣，仲請埋已經改名做「李施嬅」嘅李詩韻做姊妹。話晒李施嬅係男友Phil嘅舊愛，杏兒認真夠晒大方，唔知杏兒會唔會請Bosco去飲？
不過呢，杏兒頭先接受《蘋果》訪問時，就否認年底結婚，佢話:「冇啲咁嘅事，男朋友唔係圈內人，希望大家俾啲空間佢，亦希望大家唔好再叫佢『港姐殺手』，唔想再影響到大家嘅朋友。我講過有好消息一定同大家講，多謝大家關心！」
另外呢，報道話，Phil雖然被喻為金融才俊，原來佢只係佔夜場Play嘅二十分之一嘅股份，亦唔係公司董事，更冇物業喺手，只係租尖沙嘴服務式住宅，早前仲搬咗去杏兒嘅單位同居，即係話杏兒身家隨時多過對方，但係真愛係無價，杏兒又點會介意吖！
|
鍾意就快D Share啦！
|
|
|
