真人騷
窮小子洗心革面 張建聲：要攞番我嘅尊重
因為有空檔，我在訪問張建聲之前，先行登入公司圖片系統瀏覽他的資料相。
一看不得了， 100張裡有 95張是床照，電腦屏幕一片肉騰騰、火辣辣，不是《一路向西》裡嫖完再嫖，就是《壹獄壹世界》蹂躪緊朋友妻，出道五年，入型入格拍了五套三級片，簡單來說，這就是我對這個新演員的第一印象。
然後是在影樓裡，等到拍完戲從屯門趕到將軍澳工業邨的張建聲本人，我沒有想到會從這個電影裡的雞蟲口中，聽到這些年裡聽過最有志氣的一句話：「你 google張建聲嗰啲情慾劇照，我希望未來會由其他相蓋過。」
聽 32歲的張建聲說他的故事，我們用的是倒敍法：
又肥又瘦拍《壹獄》，狂吃再狂減不算甚麼，他說最煎熬的是停工一年賭一鋪，大有可能會輸光；做演員前是 model，那些年姿整到男人老狗落轉街都要化妝，谷肥自己做少年萬梓良？咪玩
入行前係職業蒲精，夜夜笙歌晚晚攬女，一夜情泛濫到一個程度，是睡醒不知道自己在哪一區誰的卧室裡，空虛到自己都覺得怕；最後是童年，他說着說着，哭了：「香港係福地，不過我哋屋企唔係幸福嘅一群。」父親爛賭，媽媽帶着兩兄弟躲到臨時陡置區，沒錢吃飯、米缸常吉，每天回家鎖匙孔擠進膠水、鐵閘被鎖、追債電話不停響：「我屋企百毒不侵，我拍咩都好，你哋點笑我都得，屋企人受得住就得喇。我行呢條路，有用力、有用心㗎，拍《壹獄壹世界》就係要攞番我嘅尊重。」
將近三十歲才找到興趣和人生目標，才找到能靠自己讓母親安享晚年的方法，也許這就是為甚麼拍每套戲、拍每場床戲，張建聲都會用盡力氣、肉緊到似萬梓良。不得不承認，第一印象真的不能代表所有，這一刻，我真心希望這個男生有一天，可以說到做到。
入行拍床戲，因為獵奇心重。
點解會做咗 model？
我細個屋企環境差，讀書又唔好，所以好早出嚟做嘢。做過跟車、裝修、文員、 sales，平時就爛玩到天昏地暗幾日唔使瞓，如是者玩到廿四、五歲，跟住朋友去咗澳洲 working holiday、喺女朋友屋企餐館送外賣，玩咗一年又見悶，諗諗下，不如返香港做 model。
憑咩會覺得自己可以做 model？
照下鏡，覺得自己個樣又唔係巖巖巉巉吖……又俾我喺落機嗰日就識咗個做 model嘅女朋友喎，咁就輾輾轉轉入咗行。做咗三年，玩票拍咗幾套戲，《囡囡》、《 3D蜜桃成熟時》，到拍完《肉蒲團》識咗蕭定一。
《囡囡》你嘅角色係？
叫……「囡囡」嗰啲，同冼色麗，係床戲嚟嘅。
第一套戲就係床戲，拍咗幾耐？酬勞幾多？
開咗一日工，大概六個鐘，一萬酬勞。第一次，當試一次，床唔床戲又冇所謂，我嘅獵奇心好重。唔試，我怕我會諗成世……果然係，做戲嘅癮撻着咗，就想越做越好。
一入行場場都係床戲，酬勞仲好可觀，會唔會好多人羨慕你？
好多人會覺得，你得我都得啦……講真，好辛苦，要承受好多嘢。真係埋牙要諗好多，要小心穿崩、要顧對手想法、又要幫個女仔遮，要顧嘅嘢太多，你淨係會諗點樣拍完場戲、唔好 NG，唔會諗 sex。
溝女一夜情，從來唔使愁！
講番轉頭，點解一返香港就可以識咗個 model女朋友？
當然係蒲啦……我嗰陣時真係好鍾意玩，行李都仲喺朋友架車、屋企都未返，就直接去咗蒲。
溝起女上嚟無往不利？
我覺得唔係話無往不利，係唔使愁……落去都係為咗玩，啱 feel就會去，開場白都慳番，可以好簡單：「你成日嚟㗎？」
咁你應該唔抗拒一夜情？
我以前係嘅……我承認，一個月梗有一、兩次，嗰個階段嘅價值觀好有問題。但係玩，都唔好似嗰個洋腸 David一樣咁冇品，試想像下第日你個女俾人咁影？收手啦，施主！
有女朋友都照玩？
戒唔甩㗎喇……已經成咗癮，我覺得我啲時間就應該攞嚟玩，嗰晚唔去係浪費時間。有生理因素又有心理因素，啱 channel嘅基本上嗰晚兩個人做乜都得……做嘅時候唔會諗女朋友，第二日會有小小內疚。
玩到幾多歲至厭？
玩到一個階段，一覺瞓醒，唔知呢張床係邊個女仔屋企……其實好空虛，問自己點解要做到咁。跟住又入咗行，賺嘅錢根本就唔夠我玩，可能玩到厭、可能冇工開，亦都因為爸爸嘅病……𠵱家再有人叫，我都唔會去。
𠵱家有冇女朋友？
有呀，拍咗四年拖，佢係 dancer，佢係一個肥豬，百二磅㗎成！哈哈……唔係鍾意，我對佢係愛。
跟住你咪好冇安全感？
冇㗎，開頭非常冇，佢鍾意我呢個人，但一啲都唔信我。明明去拍嘢，佢可能覺得我去咗玩……證明我俾佢嘅安全感有幾少。有時我都會諗起以前俾我傷害過嘅女仔，執嘢走嗰日，已經傷到喊都喊唔出。
香港係福地，但我唔係幸福嘅一群。
爸爸有咩病？
上年喉嚨生癌，佢揸中港車，唔係好理自己，成日嗌喉嚨痛，終於阿媽捉佢去驗，已經第四期……醫完又再復發，其實淨番時日唔多。我仲有個阿哥，同我性格係兩極，個個都覺得我又曳又冇用，哥哥就又乖又陽光，但係我哋兩個感情又好好喎，可能屋企環境唔好啦，冇錢買玩具，我哋成日自己用紙做玩具，乜都一齊玩。
揸中港車應該夠養家有餘，點解環境咁差？
因為爸爸爛賭囉……乜都賭！以前嫲嫲開生果鋪、屋企喺旺角有樓、阿哥幼稚園讀九龍塘㗎，輸到冇咗層樓、一晚輸咗兩架的士，成家避債避咗去陡置區，都仲係有人鎖大閘、唧膠水入門匙窿、屋企電話不停咁響，太細個唔識驚，但係識分冇啖好食，成日鼓油撈飯、公仔麵，米缸經常都吉。陡置區嗰度七層唐樓，住嘅全部都係社會最低層嘅人，隔籬屋道友咩人都有，阿媽就係咁每日揹我上七樓，對手仲要拎住米、拎住餸，日日趕住八點前沖晒涼食晒飯，因為每戶得嗰一個燈泡仔、夠鐘就會截電，成條走廊黑蜢蜢。沖涼冇熱水、廁所浴室都係共用，你諗下，阿媽一個女人仔住喺嗰啲地方，阿爸又為咗避債晚晚唔返屋企……有時我會諗，一夠大我就出去玩，因為太唔想返去、太唔鍾意個屋企。
有冇怨過爸爸？
阿哥好顧家，所以一直有啲嬲爸爸……我哋兩兄弟，點都要一人攬一個，阿哥唔睬爸爸咪我睬囉。𠵱家係我俾錢爸爸賭，一、兩百蚊俾佢玩下……佢做完手術切開咗聲帶，唔講得嘢要用小朋友畫板同我哋溝通，幾十歲人一身病、邊度都唔去得，仲要做化療咁辛苦，時日都唔多，咪俾佢玩下囉……你生得我出嚟，我點都要理佢。哥哥受咗太多苦，佢嬲爸爸都正常，雖然話香港地好幸福，但係我哋屬於唔幸福嘅一群，所以我做嘢特別盡，從來唔介意人哋話我拍三級片……你笑我？咁叻你去拍我行呢條路，有用力、有用心㗎，我拍呢套《壹獄壹世界》就係要攞番我嘅尊重。
拍《壹獄壹世界》前冇人尊重你？
唔會得到正常嘅尊重：又拍呢啲吖？你拍嚟拍去咪呢啲囉，搵你就啱喇！拍得幾好喎！……講係咁講，但有入場睇咩？冇囉！好彩，我屋企百毒不侵，我拍咩都好，我屋企人受得住就得喇。我以前咁爛玩，但係起碼入咗呢行，我阿媽見到佢換咗一個乖仔、一個好仔返嚟。但激情戲都拍夠喇，我想觀眾認識我，已經做到，你 google張建聲嗰啲情慾劇照，我希望未來會由其他相蓋過。
最難，係睇住人哋每日進步。
做演員，你嘅目標係？
拍多啲戲、多啲人睇我嘅戲囉！我都知呢行決定因素好多，係態度決定命運，有冇下過苦功人哋知。我想盡我能力賺多啲錢，買樓俾阿媽，可以嘅話再買層樓俾哥哥，我想佢哋唔使咁辛苦……我𠵱家自己使好少錢，又唔買衫、出街又唔化妝。
你以前化妝出街？
我以前好姿整㗎，做 modelling時日日出街都會化妝。所以拍《一路向西》時，導演好唔鍾意我，我哋返公司排戲幾個月，佢同啲同事就日日插我幾個月：「喂！唔係咁囉！你不如唔好撈」佢嘅 mean唔係言語，係俾我 feel到成班人都唔鍾意我，埋身吹下水、食支煙，都唔肯俾我入個圈……嗰幾個月呢班人好成功，去到尾聲我真係崩潰，仲化妝咩！頭都唔梳、戴住眼鏡、踢住拖、耷住頭返公司，就係嗰日，佢話就係要我呢個 feel。
為咗《壹獄》肥到二百磅，又肥又瘦最辛苦嘅地方係？
肥嘅時候要 set鬧鐘食麥記、減肥時肌肉痛到着衫都要人幫，呢啲唔算得乜嘢，最辛苦係我用嚟增肥嘅十個月乜都冇做過，睇住人哋日日 update動向開呢樣開嗰樣。老闆（蕭定一）好好，嗰十個月有生活費，我食乜都可以 claim，但個心理關口最難過，人哋進步緊時，我做緊嗰樣嘢並唔知道個結果會係點。
點解唔想再拍床戲？
我唔想再停留喺嗰個層次……
但床戲都有好多層㗎。
我咩層次都拍過喇，夠喇……我哋始終係亞洲人，我都仲想演其他戲。
拍過咁多戲，媽媽有冇入場睇過？
之前全部冇，直到《壹獄壹世界》，佢話平時都唔覺我肥到咁，佢話終於見到我似番個演員……嗰日係首映，哥哥陪阿媽入場睇，阿哥話全套戲阿媽都喺度微微笑。
|
鍾意就快D Share啦！
|
|
|
