胡杏兒同男友公布拍拖後非常高調，經常被影到拖手遊街。《蘋果日報》圖片
封面
兄弟洩密 香港擺酒 胡杏兒 12月嫁港姐殺手
35歲胡杏兒去年 12月被本刊率先踢爆與「港姐殺手」、夜場 Play老闆 Philip Lee（ Phil）拍拖，隨即公開戀情，雖然拍拖未夠 1年，不過感情非常穩定，打風都打唔甩！
年紀唔細，加上男友有事業有外型，杏兒當然咬實荀盤唔放。據知 Phil已向女友求婚成功，兩人更剛於 5月中預支蜜月，同遊杏兒的 dream place馬爾代夫。希望趕得切今年 12月在香港結婚擺酒的 Phil，最近就要求一班相識多年的舊同學，預留年尾日子做兄弟。
大方邀請男友前度李施嬅做姊妹團的杏兒，唔知會唔會請 Bosco飲呢？
秘遊馬代
今年 1月，杏兒陪男友飛台灣參加婚禮，被影到當街激咀纏綿，難捨難離。短短 2日 1夜短 trip唔夠喉， Phil上月又炮製另一個浪漫之旅——馬爾代夫。
杏兒 11年接受訪問時，透露好想去馬代旅行，「我真係好想趁未陸沉前去玩，不過真係連瞓都冇時間！」當年與 Bosco工作至上，拍拖期間未能夢想成真，事隔 4年，熟知女友心意的 Phil送上驚喜，得知杏兒上月中有幾日空檔，即訂附設私人泳池的獨立水上屋過二人世界，連早餐都在房內望住海景歎，保證全日 24小時不受騷擾禁室培慾。
英國幫兄弟團
杏兒 35歲唔後生， Phil非常心急同女友生 B組織家庭，早前鼓起勇氣向杏兒求婚，杏兒亦爽快答應。心情 high爆的 Phil礙於女友身份未能即時公布喜訊，但私下已向英國一班舊同學 hold定檔期，「 Phil早排喺英國班朋友個 group chat度，叫晒所有人 hold定 12月個期返香港，個個問佢點解，原來係要幫做佢兄弟！」除了英國幫，與唔少圈中人相熟的 Phil，亦會搵吳嘉龍、巫雨平等蒲腳做兄弟，務求人多勢眾以最強陣容迎娶杏兒。
至於杏兒的姊妹團無甚驚喜，鐵腳係「胡說八道會」幾個未嫁得出的姊妹，包括胡定欣、黃智雯和姚子羚等，其中李施嬅曾經同 Phil拍過拖，但杏兒竟然請埋對方做姊妹，嫁得出果然係大方啲！
搵情敵做姊妹
Phil同杏兒一齊之前，曾經同李施嬅（右）拍過拖，難得杏兒唔介意，竟然預埋對方做姊妹團之一， EQ冇得頂！
「今年好多變動！」
杏兒 7月將約滿大台，有傳離巢後會以 2,500萬加盟蕭定一公司 3年。唔憂冇人要，杏兒日前出席活動時一反常態，忽然自爆隨時閃婚，「𠵱家年紀唔細，唔可以淨係睇錢，仲要睇有咩發展、前路點走，而且今年好多變動！（嫁人唔做？）講真，呢樣嘢要考慮，男友好 open，都有畀意見我！」本刊週一（ 8日）致電 Phil，但至截稿前仍未回覆。
2千幾萬都未必請得郁，出道 16年的杏兒當然係搵落大把唔等錢使，反而被外界形容為「金融才俊」的 Phil，身家未必及得上未來老婆。雖然身為夜場 Play老闆，但其實 Phil所佔股份不多，只有 1/20，亦不是公司董事；物業更加係零，現時租住尖沙咀一個服務式住宅，月前更搬去女友郝德傑山的單位同居。
難得小富婆杏兒唔介意搵得多過男友，呢個視后娶得過呀！
大把後路
7月約滿大台，胡杏兒收山嫁人唔做又得，繼續賺人仔亦得，得咗！
|
鍾意就快D Share啦！
|
|
|
