滙豐紀念鈔終於有得拎，但今次的紀念鈔，似乎唔多炒得起。
今朝9時，大會開始換取紀念鈔。首批幸運兒唔少都想「即賺」，選擇即場轉售，不過叫價似乎唔多理想，有人成功以六萬蚊整套成交(包括35連鈔、三連鈔、及單鈔，成本價$25,640)，已經高呼「好彩」、「合理」，但遇著冧巴唔靚，隨時被壓價至低於三萬元。
大批來自廣州錢幣公司的職員，晨早已經帶備現金，在場等候，不過，他們卻統一口徑，大唱淡風，指今次紀念鈔的銀行定價太高，難以炒起，更說公司不大願意接收。之不過，既然不想接收，又為何要派十多人專程來港？實在耐人尋味。
