熱爆娛樂: 那些年的美味　最想邊間食店復活？ [FACE

2015年6月10日星期三

香港租金出哂名貴，亦搞到唔少小商鋪結業，就算那些年都有唔少大型連鎖食店都因為貴租而捱唔住，無論周柏豪鍾情嘅屋邨大排檔，定係盧凱彤鍾情嘅 donut都冇得留低。唔通食店規模要大到集團霸權咁先生存到？或者好似 689話齋都係關於土地問題囉。

青衣邨冬菇亭同唔少舊屋邨一樣，有好多大排檔，主力做街坊生意， 14年翻新將所有大排檔清拆，今年 8月重開，但爭鮮及大家樂等會進駐。

𠵱家好多特色食店都冇咗，我最想有番青衣邨個冬菇亭，嗰啲冬菇亭大排檔，其實我好鍾意去嗰度食嘢，一家人熱熱鬧鬧，講嘢可以好大聲，又有好勁嘅風扇不斷咁吹住，我覺得氣氛係好地道㗎！

我想 Wendy's重生，我記得細細個補習時候，阿媽一定帶我去食，最好食係嗰個卷卷薯圈，令我哋對薯條改觀嘅。

《蘋果日報》圖片

Wendy's 80年代曾經以「得意妹」喺尖沙咀開設分店，做咗 3年就結業，到 91年以「雲狄斯」再喺香港出現， 2000年撤出香港。

我最懷念嘅食店梗係 krispy kreme，呢啲咁甜嘅美食，冇咗你唔覺好可惜咩？佢最好食嘅，而我每次都食嘅就係佢嘅原味，但我每次只可以食一個，如果唔係我會有糖尿病。

Krispy Kreme美國著名 donut連鎖店， 06年來港開分店，但經營到 08年就全線結業。

《蘋果日報》圖片

如果我可以再見番一間餐廳，我會想東東雲吞，可能係一種情懷，因為細細個好鍾意食雲吞啦，媽媽都會帶我食東東雲吞，雖然𠵱家有啲可以攞返屋企自己整，但我覺得新鮮即整嘅，會比較温暖同好食囉。

東東雲吞麵 80年代興起，曾經喺電視賣廣告，廣告歌仲係由已故黃霑作曲， 2000年後結業。

《蘋果日報》圖片

雖然 M記喺香港橫行，不過唔少 90後後生仔女都仲記得哈迪斯，哈迪斯 06年撤出香港，但扭紋薯條同磨菇飯，班後生仔都仲回味緊。邊個話香港人善忘，做得好嘅，一世都記得！

哈迪斯 91年來港，高峰時期有 25間分店，其磨菇飯及薯條深得市民歡迎，可惜 06年全線結業。《蘋果日報》圖片

周生　 24歲

我最想哈迪斯復活，因為好食，我特別鍾意食佢嘅磨菇飯，其他冇佢咁好食。

陳生　 20歲

哈迪斯呢間好經典，因為佢哋嘅扭扭薯條係最好食嘅，細個嗰陣成日同屋企人一齊食。

Jimmy　 21歲

呢個係童年回憶囉，我剩係記得佢哋嘅薯條，好想有番以前嘅感覺，唔想剩係食直嘅薯條。

鍾意就快D Share啦！