2015年6月10日 星期三

那些年的美味 最想邊間食店復活? [FACE - 420] MF,



全知言

那些年的美味 最想邊間食店復活?

香港租金出哂名貴,亦搞到唔少小商鋪結業,就算那些年都有唔少大型連鎖食店都因為貴租而捱唔住,無論周柏豪鍾情嘅屋邨大排檔,定係盧凱彤鍾情嘅 donut都冇得留低。唔通食店規模要大到集團霸權咁先生存到?或者好似 689話齋都係關於土地問題囉。

周柏豪 懷念冬菇亭

青衣邨冬菇亭同唔少舊屋邨一樣,有好多大排檔,主力做街坊生意, 14年翻新將所有大排檔清拆,今年 8月重開,但爭鮮及大家樂等會進駐。

𠵱家好多特色食店都冇咗,我最想有番青衣邨個冬菇亭,嗰啲冬菇亭大排檔,其實我好鍾意去嗰度食嘢,一家人熱熱鬧鬧,講嘢可以好大聲,又有好勁嘅風扇不斷咁吹住,我覺得氣氛係好地道㗎!

張致恒 歎 Wendy's漢堡

我想 Wendy's重生,我記得細細個補習時候,阿媽一定帶我去食,最好食係嗰個卷卷薯圈,令我哋對薯條改觀嘅。

《蘋果日報》圖片

Wendy's 80年代曾經以「得意妹」喺尖沙咀開設分店,做咗 3年就結業,到 91年以「雲狄斯」再喺香港出現, 2000年撤出香港。

盧凱彤 愛 Krispy Kreme冬甩

我最懷念嘅食店梗係 krispy kreme,呢啲咁甜嘅美食,冇咗你唔覺好可惜咩?佢最好食嘅,而我每次都食嘅就係佢嘅原味,但我每次只可以食一個,如果唔係我會有糖尿病。

Krispy Kreme美國著名 donut連鎖店, 06年來港開分店,但經營到 08年就全線結業。

《蘋果日報》圖片

Eveyln 食東東雲吞

如果我可以再見番一間餐廳,我會想東東雲吞,可能係一種情懷,因為細細個好鍾意食雲吞啦,媽媽都會帶我食東東雲吞,雖然𠵱家有啲可以攞返屋企自己整,但我覺得新鮮即整嘅,會比較温暖同好食囉。

東東雲吞麵 80年代興起,曾經喺電視賣廣告,廣告歌仲係由已故黃霑作曲, 2000年後結業。

《蘋果日報》圖片

講搵食 街坊最掛住哈迪斯

雖然 M記喺香港橫行,不過唔少 90後後生仔女都仲記得哈迪斯,哈迪斯 06年撤出香港,但扭紋薯條同磨菇飯,班後生仔都仲回味緊。邊個話香港人善忘,做得好嘅,一世都記得!

哈迪斯 91年來港,高峰時期有 25間分店,其磨菇飯及薯條深得市民歡迎,可惜 06年全線結業。《蘋果日報》圖片

周生  24歲

我最想哈迪斯復活,因為好食,我特別鍾意食佢嘅磨菇飯,其他冇佢咁好食。

陳生  20歲

哈迪斯呢間好經典,因為佢哋嘅扭扭薯條係最好食嘅,細個嗰陣成日同屋企人一齊食。

Jimmy  21歲

呢個係童年回憶囉,我剩係記得佢哋嘅薯條,好想有番以前嘅感覺,唔想剩係食直嘅薯條。

鍾意就快D Share啦!
Related Posts Plugin for WordPress, Blogger...