掃呢頁CODE去手機

2015年10月21日 星期三

瘦唔番 生完 8個月未修身 陳茵媺變肥師奶 [FACE - 439] 茵媺,陳茵媺,MF,



週日( 18日)陳茵媺獨自到超市掃貨,生咗細仔 Nathan Lucas已 8個月, Aimee仍未修到身,條腰唔知去咗邊!

真面目

瘦唔番 生完 8個月未修身 陳茵媺變肥師奶

幸福少奶奶陳茵媺(Aimee)今年 2月誕下第 2個囝囝陳浩鋒,休息冇耐就宣布復出拍杜汶澤新戲《開飯》;喺馬來西亞拍咗個幾月, Aimee已經返咗香港,日前仲單拖去超市買餸,不過 Aimee生完之後似乎仲未修到身,鬆身裙下粗腰依然可見,加上近日剪咗頭髮, Aimee儼如一個肥師奶,原來啲福氣真係會發出嚟㗎!

陳茵媺同陳豪婚後生咗大仔 Aiden之後,陳茵媺已少接工作,專心照顧囝囝同老公;今年 2月誕下細仔 Nathan Lucas兼且 7月約滿大台後, Aimee就決定復出拍戲。

今年1月陳豪、陳茵媺抱住囝囝 Aiden出巡,當時陳茵媺仲佗緊細仔,身形發脹不少。 《蘋果日報》圖片

Aimee上月出席活動時身形已略肥,估唔到身形不斷發脹變咗肥師奶。

睇番 07年陳茵媺喺《原來愛上賊》嗰陣身材超索,當時仲未同陳豪拍拖。

嚴選罐頭成份

頭炮係杜汶澤嘅賀歲片《開飯》, Aimee更為咗套戲甘願暫別兩個囝囝,飛到馬來西亞拍攝個幾月,連中秋節都同唔到家人過,今個月初至返香港咋!

原本以為 Aimee一定準備充足至復工啦,但週日( 18日)佢獨自出現喺大埔康樂園一間超市掃貨,就見到佢明顯仲未修身,似足肥師奶買餸咁款。

Aimee着住鬆身連身短裙喺超市左揀右揀,又轉身又彎腰,但昔日嘅纖腰已經變咗肥腰,好彩塊面依然好瘦,相信畀心機操吓就會索番晒!當日 Aimee喺超市逛咗成粒鐘,集中掃各類食品,又好細心咁逐包逐罐去細讀啲成份,梗係健康有營養至畀得兩個囝囝同老公陳豪食嘛! Aimee買咗菜、盒裝士多啤梨、芝士、麥片、腸仔同罐頭等等,就上車由司機載返屋企;之前 Aimee話過鍾意喺屋企煮西餐,會唔會因係咁食肥咗呢?

凸腩

Aimee好仔細研究食品嘅成份,諗過計過至買,老公陳豪同兩個囝囝真係有福!

買咗一車豐富食物,陳茵媺至安心返屋企。

巨籮

司機喺門口等候 Aimee, Aimee並冇擺少奶款,親自將食品搬晒上車冇叫司機幫手,但一崵身,巨籮就現形

Aimee復工首個作品係杜汶澤賀歲片《開飯》, Aimee喺片中飾演廚師,剛剛完成馬來西亞戲份返港。 網上圖片

冇肥過

陳茵媺產後發福未修身,有啲明星藝人就好得天獨厚,生完身材都好似未生咁 fit,甚至被懷疑過假生仔添!

陳慧琳

陳慧琳( Kelly) 09年誕下蝦餃仔劉昇, 3年後誕下小籠包劉琛,兩次生完之後身材依然 fit到漏,第一胎蝦餃仔出世後,甚至有內地傳媒指 Kelly係假生仔,認真好想像力。 Kelly就分享過心得,稱每日狂飲水直至去廁所,既可排毒又除水腫喎,得唔得要試過至知。

《蘋果日報》圖片

《蘋果日報》圖片

周汶錡

今年 7月才剛榮升做媽咪嘅周汶錡亦好犀利,生咗 Jacques Lepeu一個月就出席活動,而且身形完全冇走樣,唔通做 model真係識 keep啲?

網上圖片

網上圖片

徐淑敏

港姐徐淑敏( Suki)與黃浩結婚 6年育有 3個女,然而每次 Suki生完依然樣靚身形又 fit, Suki曾透露生完第一胎身材已極速回復 108磅,不過冇透露瘦身方法。

《蘋果日報》圖片

網上圖片

採訪、撰文:娛樂組

攝影:娛樂突發組

鍾意就快D Share啦!