全知言
最走漏眼男藝人
大台小生花旦走吓一個，走吓又一個，主角所剩無幾之外，其實旁邊嘅二線，或者綠葉演員都唔剩得好多！最近就有陳國邦自爆，因為 15年得不到做主角嘅機會而決定離巢出外闖一闖。老實講，好多演員花盡一生精力，都係等一個機會。
其實大台仲有好多有實力嘅演員而未被賞識，今期全知言就問吓大家，覺得最走漏眼嘅男藝人有邊個先！
森美
陳國邦其實佢做嘅每一套戲我都覺得好讚歎嘅，因為佢個處理方法係好用心，好踏實，同埋好勤力。但係最重要嘅係，一個演員好努力去做一樣嘢而你唔發現，咁佢就做得叻喇！行外人會講「做得好舒服吖」，但係你要知道，做得好舒服就係當中最困難嘅，所以我覺得佢好有實力。
王宗堯
陸駿光，佢的而且確係一個非常之有心嘅演員，而且佢嘅演技係非常之硬底子，所以嚟緊就算無咗港視都好啦，我哋將會有其他電視台，亦都有好多電影會拍嘅，所以希望佢可以喺唔同嘅地方發光發亮！
梁思浩
我覺得 TVB一直走漏眼係阿 Ben，即係阿海，黃智賢呀！佢喺國內做嘅電視劇都係做一線㗎，相反喺 TVB要做二線，除咗友情同埋人情分之外，我覺得好多人都覺得阿 Ben有觀眾緣，俾心機做戲，阿 Ben同麥包我都覺得 TVB應該俾多啲機會佢哋。希望佢哋快啲成為下一個黎耀祥
張建聲
喺我心目中覺得最值得加許嘅演員，我心目中有一個就係何華超先生。係我師父呀！因為佢，我先鍾意做戲，咁我希望以後大家可以多啲關注佢嘅作品
FFX
Shirley：其實我覺得最走漏眼就係黎諾懿，我非常之鍾意佢做馬壯嗰個角色，因為覺得好 man好靚仔，同埋覺得佢個律師形象好專業呀！
Mizaka：我覺得最走漏眼係麥包，自己喺中學嘅時候已經好鍾意睇佢做戲，但係佢成日都做唔到好大嘅角色囉，所以幾期待佢做主角。
Ceci：我覺得最走漏眼應該係陳展鵬，之前見佢做奸角真係入型入格，睇到想打佢，之後做好嘅角又覺得佢好淒涼，希望佢如果努力嘅話快啲上返一線（唔係已經一線咗?）
蔣志光得民心
其實走漏眼又點只圈中人講嗰幾位吖，原來一班 90後心水仲清，點估到佢哋會覺得魯振順係被走漏眼嘅一個呢！
李小姐 20歲
蔣志光因為佢做戲好自然，但係佢好似做嚟做去都係配角，其實由細到大都睇好多佢有份嘅劇，但係有咩代表作又唔係好記得喎！
甄小姐 19歲
蔣志光都係其中一個啦，佢好似做咗咁耐都係做二線，佢做好基本嘅動作、表情就已經好表現出個角色嘅特色，活靈活現！
阿朗 18歲
魯振順吖，成日都有佢份，實力派演員，佢喺 TVB咁多年，東方不敗都俾佢做過喇！好耐以前嘅《笑傲江湖》。
阿然 20歲
河國榮呀！細細個做警司好深入民心囉，集集都係警司嚟嘅。鬼佬以前無學歷好難做嘢，佢自己硬住頭皮去搵 job做，喺廣播道，都係自己搵搵吓搵返嚟，跟住就做演員做到𠵱家。（係咪睇完《 FACE》專訪？）
即時報料 facepop
熱線： 9222 0828
電郵：facenews@nextmedia.com
facebook： Face Magazine inbox
line、 we chat id： facemagazine
|
鍾意就快D Share啦！
|
|
|
