2015年10月21日 星期三

主播男神唔撈 葉昇瓚搵後路:怕被睇厭 [FACE - 439] MF,



當年因為髮型太有層次搞到花仔唔 like,做做下直播都要換上黃紫盈,𠵱家離職當然可梳番個有層次嘅髮型

爆 Like王

主播男神唔撈 葉昇瓚搵後路:怕被睇厭

大台唔只小生花旦流失,連新聞主播近年都成日有人走,繼女將方健儀、周嘉儀和黃紫盈等離開,上週輪到靚仔主播葉昇瓚離巢, 11月會去財經公關公司 PR Aisa返工。

31歲葉昇瓚說轉工唔係因為新聞部人事複雜,主要原因係想多啲時間陪家人。原來 31歲、 6呎 1吋高,做過 model同空少的靚仔主播,竟然都擔心觀眾睇厭。他說:「主播呢行壽命好短,冇可能一世都喺鏡頭前面讀新聞,自己都有被睇厭嘅一日。」

F:《 FACE》 葉:葉昇瓚

F:黃紫盈喊關你個髮型事?

葉:呢件係兩年前嘅事。當時有我同黃紫盈、張文采,因為我當時髮型有啲層次,一枝枝咁豎起,咁老細就唔係咁鍾意,我當初冇咩點為意啦,出咗鏡啦,自己冇再整番齊個髮型,老闆好唔滿意,就叫番我出嚟,叫黃紫盈頂替我新聞。老闆喺電視度見到, message我哋,叫我出返嚟,去廁所整下個髮型。佢唔鍾意男仔啲髮型,有層次一枝枝咁樣,佢鍾意一塊好整齊咁樣,好貼服咁樣。其實我都唔知佢點解會喊,應該唔關我事,可能佢突然間諗起啲傷心事啩!我同佢都係好朋友嚟,我事後有問佢係咪唔想幫我讀呀?所以喊呀?佢話唔係,咁我就冇再追問,因為佢已經成為大家焦點,佢好似好煩咁,我費事再煩佢喇。

無綫新聞部男主播髮型冇層次,原來係因為花仔(袁志偉)偏愛,搞到靚仔嘅葉昇瓚都要變薯嘜。 電視畫面

袁志偉(無綫新聞及資訊部總監) 網上圖片

由於葉昇瓚髮型,令黃紫盈臨時頂上,最被發生流淚事件,葉昇瓚:「我到𠵱家都唔知點解。」 電視畫面

F:做咗主播前後 6年多,點解又轉工?

葉:我覺得呢行壽命比較短,我都要諗下自己嘅前途囉!冇可能一世都喺鏡頭前面讀新聞呀!可能有啲新力軍加入喇,係咪要揾下後路呢?我自己都會有老嘅一日,有被睇厭嘅一日,同埋主要我有家庭喇,生咗個女,希望有多啲時間陪下屋企人囉!𠵱家返 shift多,星期六、日都要返工,希望可以有 regular day-off有時間陪屋企人。

F:你事後有份聯署撐同事?

葉:我係有份嘅,因為當時大家對呢件事都好憤怒呀,覺得點解好限制住我哋呀,做到有啲灰心,失望。點解會有聯署呢?當時驚個個記者都有喇,我哋主播冇呢,會驚俾《蘋果》寫喎,驚俾《蘋果》大造文章,講笑啫!最主要原因係我哋要支持番記者,我哋坐埋一條船,我哋想對佢有少少嘅鼓勵囉。唔係簽個名就係反老闆,係呀,老闆睇到覺得反佢,因為個個都有簽名,我諗佢唔係好記仇嘅,大家繼續做嘢,我都係冇穿冇爛。

F:女主播係咪成日爭上位?

葉:唔係好似後宮咁複雜嘅,是非唔係大家所諗,我唔鍾意你就杯葛你,連埋其他人杯葛你,絕對唔係嗰啲,唔係小學生、讀書咁樣。可能係大家太認真做嘢,喺公司唔會個個好啱傾,你又搭晒膊頭好 friend咁,咁冇咁 friend嘅就會剩係顧住做嘢囉,大家就會有個錯覺,兩個唔啱喇,唔講嘢喇,令人覺得好似有是非。

F:成日被人話無綫新聞是是但但,其實有乜感受?

葉:唔只出面啲人咁講,連我啲朋友都咁講「你哋 tvb好是但喎」,自己聽到都有少少「哽」住嘅,因為我哋出去跑嘅都係用個心去做,我哋每一個都想單新聞出到街,唔係偏側咗一邊,唔係出面所講嘅事事但但,我哋真係有落去揾料,證明到事情真相先報導出嚟。

F:主播都驚被人睇厭?

葉:呢個感覺純粹我自己覺得啫,我覺得呢行壽命好短,自己又想有新嘅發展,但最主要係想多啲陪屋企人。

網上圖片

6呎 1吋高又成日做 gym,兼係好爸爸,葉昇瓚絕對係男神材料。 網上圖片

F:大家好留意主播嘅外表,你覺得點呢?

葉昇瓚鏡頭前西裝筆挺,但原來佢唔鍾意着,他說:「我好大汗㗎,着理西裝褸有時真係好熱。」

葉:我覺得唔係一件太好嘅事,因為主播其實都係一個人,出到街都係平常人一個,唔需要太過着重佢啲化妝呀, set頭呀,我覺得睇番當日嘅新聞會好啲囉,人哋想睇咩想講咩,都係人哋話事囉!我哋唔好太標奇立異,太誇張,做番自己職責就 ok㗎喇。

F:七警事件,你會照讀「拳打腳踢」字眼?

葉昇瓚喺 fb寫上新聞部最後一天嘅感受,其中寫到「公司愈大人事便愈複雜。」但他說:「其實新聞部一啲都唔複雜,大家成日圍住講娛樂新聞同低能嘢。」 網上圖片

葉:當日我就返夜晚,嗰時所有稿都轉晒喇,已經冇「拳打腳踢」呢 4個字。

如果當時我遇到呢 4個字,我應唔應該讀出嚟呢?我要信採主囉,因為所有稿都係採主審過呀,當時最大嗰個覺得冇問題先可以出街,咁我應該相信佢囉,我會照讀。

髮型: Kith

場地: The 59 Tattoo& Barber Shop

( instagram:THE59TATOO)

鍾意就快D Share啦!