明年4月啟播撞正亞視停牌 now免費電視ViuTV主打真人騷
亞視明年4月1日免費電視牌照屆滿，「小小超」李澤楷旗下電訊盈科成立的香港電視娛樂有限公司的免費電視台則同月緊接開台，還會提早一個月試播。新台昨宣佈命名ViuTV，更會主打實況娛樂為主，當中不乏玩真人騷，實行為觀眾帶來新鮮感。
香港電視風雲，過去幾十年都是無綫鬥亞視，兩台強弱立見，亞視過去幾個月又糾纏股權轉讓，至上月有新股東中國文化傳媒國際控股注入100億染紅資金，有意重整旗鼓再申請牌照，與此同時「小小超」李澤楷旗下電訊盈科成立的香港電視娛樂有限公司的免費電視台，昨日正式宣佈改名做ViuTV，台徽為白底英文字，設計簡約，明年4月經數碼地面電視頻道99台廣播，據知該台有意提前一個月、即3月率先試播搶收視。
大會昨晚在中環PMQ元創方舉行的發佈會，邀請了大佬孝邵仲衡、葉蘊儀、前新聞之花周嘉儀、新聞王子伍家謙、柳俊江、邵音音、鄧穎芝、龍小菌、前HotCha成員黎美言（Winkie）和唐紫睿（Hazel）等撐場，舞台佈置成舊式有線電視機，嘉賓進出大螢幕。
■ViuTV昨宣佈命名和台徽，可是撐場的藝人大牌欠奉。
■邵仲衡謙虛拒接受「一哥」稱號，左為黃心美。
■葉蘊儀下月將隨攝製隊到意大利拍攝旅遊節目。
■周嘉儀應邀為口才節目《巨門陣》做評判。
斥三億廿項目
港娛總經理魯庭暉昨表示改名ViuTV：「名稱中V代表View同Video，i同u係我與你，象徵ViuTV核心就係人，人性、真人真事係最好睇。」ViuTV將製作一系列娛樂及話題性節目，同時也會搜羅全球體壇盛事、各地劇集和資訊節目等。魯庭暉透露暫時開台進行了20個項目，斥資約三億，首六年則會投資十三億，並謂：「重點係向世界接軌，提供優質節目同實況娛樂。」問到ViuTV開台可會交接明年4月1日免費牌照屆滿的亞視，魯庭暉說：「希望能夠同亞視交接到，要睇工程進度。」
至於對收視預期，魯庭暉說：「希望成個電視業上升。」該台暫時有300名員工，仍在招聘中，明年3月試播時，會全日24小時播映，不排除最初會有重播，新聞部則會跟Now TV合作，球賽方面，他說：「會有歐洲好睇一啲盃賽。」
■Hazel谷爆D奶搶鏡，身邊的龍小菌卻打扮密實。
■紅色火辣的楊柳青，成功搶去伍家謙和馬啟仁（右）鏡頭。
邵仲衡毛管戙
邵仲衡近日為ViuTV助陣參演開台劇《瑪嘉烈與大衛》，昨晚畀面撐場儼然是「一哥」，他說：「呢個名毛管戙，我盡量做到最好，一哥通常捱唔到好耐。」邵仲衡已開拍《瑪》劇兩個月，他說：「內容好得意，有時事又有兩性關係，對白好啜核。」他跟ViuTV是部頭合約，他說：「大氣電波應該係咁，咁嘅方式少怨氣。」
周嘉儀則會為一個口才節目《巨門陣》做評判，她說：「呢個台好多嘢好創新，我唔會做主播，都唔會簽約，係個別合作，希望多啲喺財經上合作，多一間電視台係好，有競爭先有進步。」
而有份主持重頭旅遊節目《跟著矛盾去旅行》的葉蘊儀，下月則孖連詩雅到意大利拍外景11日，預計拍兩集，每集一小時，葉蘊儀說：「節目希望唔同年紀、唔同性格嘅人一齊旅行擦出火花，意大利係藝術發源地，我都有去過當地博物館。」葉蘊儀支持香港多個免費電視台，她說：「對觀眾係好事，會有唔同選擇。」
採訪：張俊銘、羅慧敏
攝影：陳志嵐
開台睇乜：重鎚旅遊
ViuTV將於明年4月啟播，推出的不同類型節目中，有實況娛樂節目《跟著矛盾去旅行》、形式以二人組合作來個深度旅行，現時組合包括林日曦與蔣麗芸、戴夢夢與邵音音以及連詩雅和葉蘊儀，據知之後還有不同組合誕生。
此外，該台亦會衝出海外，如《巨門陣》已成功輸出日本。ViuTV還會炮製真人格鬥騷，請來八位來自不同界別的靚女，包括黎美言、鄧穎芝、龍小菌、劉燕妮、唐紫睿、郭思琳、王蘊妮及鄧洢玲，要簽下生死狀以真人格鬥比賽。開台劇《瑪嘉烈與大衛》，由大佬孝邵仲衡任男主角，配上前主播柳俊江、黃心美及岑樂兒等新人，未知會否擦出火花。其他節目包括烹飪的《煮吧》、旅遊節目《歐遊全「細」界》、《暗中旅行》等。
七分天下：電視趨勢
now昨日高調宣佈免費電視台ViuTV將於明年啟動，屆時電視界勢必風起雲湧，無綫一台獨大的局面或將改寫。
|
鍾意就快D Share啦！
|
|
|
