2015年10月28日 星期三

奶奶迫做嘢 夫家唔打本 諸葛紫歧委屈:阿媽大鬧我 [FACE - 440] 諸葛,諸葛紫岐,MF,



忙工作又備受感情困擾,上週跌磅至 85嘅諸葛一臉愁容出席活動,請傳媒俾兩公婆多啲空間。

封面

奶奶迫做嘢 夫家唔打本 諸葛紫歧委屈:阿媽大鬧我

圈中人放閃晒恩愛就見得多,兩公婆利用社交網絡隔空開火、自爆陷入婚姻危機就確係第一次!九月開始,諸葛紫岐喺微博連環發炮,老公薜嘉麟終極回敬「婚姻是甚麼」,揭發三年婚姻瀕臨婚變。事件最新發展,係強勢外母喝令停戰,安排兩公婆展開七粒鐘談判、薛嘉麟主動認錯,才令事件有彎轉、諸葛態度再軟化。

拍拖好哋哋,為乜事結完婚生完仔至出事?《 FACE》獲悉極秘內幕,原來做豪門少奶奶係假象、自組公司做女強人亦係被迫,諸葛兩公婆的友人大爆諸葛婚後好委屈,唔係阿媽及時出手,兩歲囝囝真係差少少就變單親!

十個港女,九個都想搵個富二代另一半。不過係唔係排除萬難嫁得入豪門就從此可以繑埋雙手?人辦諸葛紫岐放在眼前,唔係囉!結婚三年,兩年前生完囝囝薛華韜,人妻兼人母嘅諸葛生活反而勞碌過婚前,要湊仔又要湊旗下藝人,要顧家又要飛勻中港新加坡兼顧娛樂公司,但又得唔到 Neway二少、老公薛嘉麟體諒,夫妻裂痕正是因此而起,其實就真係唔關第三者事。

老公認錯

婚前不知幾痴纏,婚後的諸葛和薛嘉麟反而自從囝囝出世後,越嚟越少同場。

奶奶冇插手

週日薛老太外出,遇見記者友善接受訪問:「我根本都唔知件事,又點會同佢哋談論過?」《蘋果日報》圖片

辛勞焗做

據悉,個多月前囝囝在學校碰撞跌倒、老公卻長期關機搵唔到人只屬導火線;其實早在囝囝出事前,兩公婆已經各有各忙,多月欠缺溝通。由婚前甜蜜、新婚恩愛,發展到如斯地步,據薛嘉麟友人透露,最大原因係諸葛自組公司,不過諸葛忙於事業,其實亦並非自私單純想做女強人而已。

原來雖然身家豐厚,薛家兩老都是白手興家,所以不會縱容兒子好吃懶做,堅持要家中後輩,包括媳婦在內繼續工作。諸葛旗下的星韜娛樂全靠自己和娘家打本,經濟獨立之餘經營亦都全靠她一己之力,得不到老公和夫家支持。星韜在北京、香港、和新加坡都有分公司,諸葛要周圍飛打理公務,工餘又要湊仔,本來已經少見丈夫,捱完仲要換來有人一句「冇人叫你咁辛苦」,自然滿肚怨氣。

全靠人大高官阿媽蘇英出口,才令女兒諸葛和女婿薛嘉麟平心靜氣傾足 7粒鐘,成功和好!

為挽救夫妻感情,薛嘉麟上週五專程安排一家三口外出享天倫,可惜一見記者興緻全消打道回府。《蘋果日報》圖片

怪獸老公

除了公事,教養兒子亦令夫妻分歧漸深。據悉家教嚴苛、自己亦有諗頭,薛嘉麟對獨子同樣要求極高,既不滿意諸葛周圍飛帶住兒子在身邊,難得見面亦不放過機會考核兒子學習進展。

諸葛友人透露,現時只得 23個月大的韜韜其實天資聰穎,不過亦都甚有性格。經常被爸爸捉住考 A至 Z,明明識都為賭氣唔願答,更加搞到薛嘉麟怪罪老婆「點教㗎!」。被老公抱怨得多,諸葛一肚苦水經常捉住友人訴苦,埋怨薛嘉麟公事煩忙唔了解囝囝進度和性格,又呻未夠兩歲韜韜現時在 playgroup玩樂居多,自己都係為貼身照顧才經常帶住囝囝出 trip,而坐慣飛機見慣世面,韜韜其實學到嘅嘢仲多過喺學校,去慣北京仲學咗好多句普通話添。

婚後榮升經理人又係娛樂公司老闆,星韜大小事都親自處理、旗下藝人樣樣嘢都親自監場,難怪諸葛忙過做女嗰陣。網上圖片

當時諸葛和囝囝亦在車內,不過就全程躲在後座不願露面。《蘋果日報》圖片

12年結婚初期,諸葛曾經不幸流產,所以囝囝出世成長,兩公婆特別緊張,亦因此現磨擦。

薛老太:我乜都唔知!

為公為私,兩公婆愈嚟愈面左左,各有各忙又搞到欠缺溝通,最終自覺委屈嘅諸葛才會出此下策在社交網絡吐苦水。一次過向傳媒及雙方父母自爆婚姻危機。

事件通晒天之後,兩邊家長態度各異,薛家老太除咗傳授夫妻相處心得外,只教諸葛多念佛經,而諸葛媽媽兼人大高官蘇英就親自出手,安排兩公婆坐低談判,一談七粒鐘,總算才令薛嘉麟主動認錯,兩公婆冰釋前嫌。

成功挽救婚姻後,諸葛和薛嘉麟暫未露面。週日( 25日),外出的薛老太就堅稱冇插手:「我根本都唔知,又點處理呢件事,年青人有自己生活方式,同我哋唔同!」而諸葛對婚變不願多提,但承認已跟老公和好,「好多謝大家關心,其實我媽咪成日都有大鬧我!我都明白好多事情要安排好啲,𠵱家我同 Ernie都有共識,有啲事會分工做,唔想老人家擔心!」甚實兩公婆嘅嘢,外人又的確難插手嘅,好似諸葛咁,呻完嬲完最終都識以大局為重原諒老公,咁咪大團圓結局囉!

曾幾何時諸葛同薛嘉麟糖黐豆一樣,最經典係入𨋢即攬被鏡頭全程捕捉。

12年豪擲 800萬打造童話婚禮、又搵埋 Chilam囝囝魔童做花童,冇人估到短短三年諸葛公主婚姻就現危機。

據悉諸葛出埠公幹愛帶囝囝在身邊亦惹來薛嘉麟不滿,委屈諸葛曾向友人呻,自己係一片苦心唔放心交託工人。網上圖片

暴瘦 85磅

身型婚前適中婚後暴瘦,跌至 85磅新低嘅諸葛否認厭食,只承認工作忙壓力大所致。《蘋果日報》圖片

做咗 Neway新抱,諸葛亦不時同旗下歌手聚會,甚至免費做形象顧問。《忽然 1周》圖片

自己婚變自己爆

諸葛同薛嘉麟多年來傳情變、傳婚變唔係第一次,不過傳聞由自己而起、兩公婆通過微博你一言我一句就真係第一次,而自從外母出手現轉機,雙方微博亦都果然停戰,雨過天晴。

27/9

突然認真 mode發微博,字裡行間疑似遇上生活難題。

30/9

越講越明,擺明對老公失耐性。

1/10

又出招,話糊塗和[容都係自己選擇。

7/10

講到賢妻良母,連日發言關婚姻事呼之欲出。

9/10

終極警告,話唔會再喺欠真心嘅人身上浪費一秒。

妻子連日炮發,薛嘉麟終於回應,用涼風刺骨講婚姻,冇得唔認!

有你冇我

薛家兩兄弟長期傳不和,亦從來唔見一齊玩樂,難得同場合照都只得 11年的外婆喪禮上。 《蘋果日報》圖片

諸葛紫岐未嫁時已經同當年仲係大少奶嘅陳法拉傳不和,其實唔只妯娌水火不融,即使薛世恒同薛嘉麟呢對親兄弟一樣關係麻麻,尤其係 09年身家超過 20億的 Neway主席薛濟傑退休,再傳兩兄弟爭產爭寵勢不兩立,最終薛嘉麟得到接管 Neway大權。

大少奶火併時速二少奶

一入豪門深似海,你估真係繑埋雙手咁易咩?先後嫁入薛家做新抱,陳法拉兩年前離婚逃出豪門,諸葛表面風光實情就搞到爭啲婚變,豪門內外真相係點?到底邊個真正開心?真係得佢兩個自己知。

網上圖片

網上圖片

各有各晒

諸葛婚前婚後差無幾,都係鍾意晒命,難怪個個估佢唔到竟然婚變。 網上圖片

離完婚,法拉索性離開埋大台去咗紐約學戲,狂晒素顏文青新生活。 網上圖片

各有各飛

諸葛婚後自己搞公司,個個星期飛北京同新加坡處理業務。網上圖片

法拉就專心打拼演藝工作,學完戲北上學劍拍《神秘寶藏》。 網上圖片

各有各湊

同老公面左左,諸葛除咗湊公司,最瞓身當然係湊個寶貝仔。網上圖片

戀情未有新動向,單身法拉就寄情落隻貓度,一樣親力親為。 網上圖片

各有各搏

婚後諸葛仲搏過婚前,冇攞過夫家一毫子自組娛樂公司,做經理人兼影視製作。網上圖片

失婚前已經夠搏,失婚後法拉更瞓身,《奇幻夜》連場床戲勝在唔使同老公交待。 網上圖片

採訪、撰文:娛樂組

攝影:攝影組

鍾意就快D Share啦!
Related Posts Plugin for WordPress, Blogger...