走位 大台捧新仔 馬國明焗埋余詠珊堆 [FACE - 440] 余詠珊,TVB,大台,馬國明,MF,

《為食神探》月前已完成拍攝，據知馬明有份擔正，余詠珊有喺背後發功。網上圖片

真面目

走位　大台捧新仔　馬國明焗埋余詠珊堆

大台一線走吓一個，走吓又一個，鬧緊小生荒就係人都睇得出，但原來仍然有小生被投閒置散喎！馬國明就係一個人辦喇。

捱咗 16年，近年都算有唔少 hit劇，好似《 On Call36小時》、《回到三國》等，高峰期一年拍 6套劇都面不改容。但自去年開始， 41歲馬明被減產，今年只得一套《梟雄》，仲要唔係男主角！曾經係珍姐愛將，但可惜大台有心捧新人接力，好在余詠珊無走漏眼將馬明收歸旗下，拍單元劇、上綜藝節目，仲有年半先約滿，吊住命先囉！

41歲的馬國明，在大台捱足 16年，近年終於有幾部代表作，一直效忠大台，點知都要被大台冷落。

工作量大減，馬明閒時只出現《學是學非》， keep住曝光囉！電視畫面

一直恨拍大陸劇嘅馬明，月初終於等到機會，與老拍檔楊怡去咗成都拍《小城大愛》，雖然只係單元劇，不過都係好開始吖！網上圖片

最近有傳余詠珊爭權力壓曾勵珍（右），不過珍姐點會咁易就範！網上圖片

新劇被抽

多得珍姐（曾勵珍）睇中，馬國明 07年開始做男一，加上聽教聽話無怨言開始被重用。不過近年大台一線藝員走得的都走，珍姐轉而力捧新人上一線，原有的馬明、黃宗澤卻要減產。

「《流氓皇帝》原先係 8月播，點知有人下旨要抽起播《樓奴》先，連埋早幾個月拍完嘅《為食神探》，到𠵱家都無通知話幾時播，其實馬明都好被動。」

去年爭視帝

去年馬明有份喺頒獎禮爭視帝，仲坐喺鎮宇和黎耀祥身邊。網上圖片

今年企一邊

今年台慶亮燈儀式，雖然馬明（紅圈）仲企到第一排，不過同被重視嘅陳展鵬、洪永城、黃宗澤等人，排位已經知高低身份。網上圖片

強國夢碎

馬明近月都好清閒，一時去踢波，一時上綜藝節目做嘉賓，據知余詠珊一向對馬明印象幾好，知道他被戲劇組棄用，立即急召佢到綜藝幫手，既可增加綜藝節目份量，馬明亦 keep住有得曝光，博有轉機。馬明曾向友人透露，「前幾年劇接劇真係堅辛苦，突然舊年開始少咗 job，換嚟有得休息都係好事，上綜藝又好，拍劇都好，有得做已經好好喇，而且合約未完都未可以有打算！」

據知馬明一心想返內地拍戲搵真銀，但自他 13年續約以來，只客串過 2套強國劇，事與願違亦令馬明心淡，家陣在大台拍劇冇得發揮，惟有轉戰綜藝吊命，馬明要捱到 18年約滿都咪話唔愁呀！

得閒踢波

由於時間多咗，馬明喺球場踢波次數亦增加，唔怪得呢排 fit番網上圖片

《愛情來的時候》去年喺新加坡拍，今年照舊原班人馬，不過去到更遠嘅德國拍攝，都要多謝余詠珊。

珍姐繼續話事

雖然有傳余詠珊權傾朝野，不過咪當珍姐死至得㗎！今年視帝邊位「實至名歸」，其實珍姐都仲好有 power嘅！撇除《梟雄》黃秋生，其餘四強都好猛料㗎！

網上圖片

陳豪《陪著你走》

組織家庭後嘅陳豪，已經將事業放喺第二位，今年套催淚劇《陪》搞到觀眾又喊又笑，就算無獎，都贏咗口啤先

網上圖片

黎耀祥《梟雄》

已經攞過三次視帝嘅黎耀祥，今次做奸到出汁嘅漢奸，加上同黃秋生呢位大師有唔少對手戲，畫面上一定好睇，至於攞唔攞獎，到時咪知囉！

網上圖片

陳展鵬《張保仔》

一線小生走淨無幾個，大台明顯谷緊忠又得、奸又得嘅陳展鵬上位，煎 pang雖然多屬陪跑，不過升咗呢先

網上圖片

歐陽震華《東坡家事》

由珍姐出到面同 Bobby傾合約問題，先唔好理《東坡》好唔好笑， Bobby俾足面大台，候視選帝嗰排座位，點都要留個位俾 Bobby

採訪、撰文：娛樂組

鍾意就快D Share啦！

下一篇 》