2015年12月2日 星期三

一句似臨記積怨 13年 陳煒賣身到 49報復萬綺雯 [FACE - 445] __,萬綺雯,陳煒,MF,

一年最多拍兩劇,唔操勞又唔志在,所以素顏被《FACE》野生捕獲,45歲萬綺雯睇落最多都係三次頭。封面一句似臨記積怨13年 陳煒賣身到49報復萬綺雯小生花旦所剩無幾,連中生中旦都冇乜幾個剩,大台冇人用唔係新聞,不過都唔使去到邊都係陳煒啩?唔只黃金時段《東坡家事》、《梟雄》,下午師奶檔《今日VIP》同《都市閒情》,最新消息開完新劇《火線下的江湖大佬》仲有陳煒版「十二道鋒味」等埋班!亞視去到大台,捱足1 ...


一年最多拍兩劇,唔操勞又唔志在,所以素顏被野生捕獲,45歲萬綺雯睇落最多都係三次頭。封面一句似臨記積怨13年 陳煒賣身到49報復萬綺雯小生花旦所剩無幾,連中生中旦都冇乜幾個剩,大台冇人用唔係新聞,不過都唔使去到邊都係陳煒啩?唔只黃金時段《東坡家事》、《梟雄》,下午師奶檔《今日VIP》同《都市閒情》,最新消息開完新劇《火線下的江湖大佬》仲有陳煒版「十二道鋒味」等埋班!亞視去到大台,捱足1 ...


一年最多拍兩劇,唔操勞又唔志在,所以素顏被《 FACE》野生捕獲, 45歲萬綺雯睇落最多都係三次頭。

封面

一句似臨記積怨 13年 陳煒賣身到 49報復萬綺雯

小生花旦所剩無幾,連中生中旦都冇乜幾個剩,大台冇人用唔係新聞,不過都唔使去到邊都係陳煒啩?

唔只黃金時段《東坡家事》、《梟雄》,下午師奶檔《今日 VIP》同《都市閒情》,最新消息開完新劇《火線下的江湖大佬》仲有陳煒版「十二道鋒味」等埋班!

亞視去到大台,捱足 19年二奶命終於有位上,之唔係騎住佢成廿年嘅萬綺雯寧願湊狗都唔肯簽約做大台一姐囉!

咩叫人各有志?

陳煒 42歲都仲肯加簽 7年長約, oncall 36小時拍膠劇拍到 50歲囉!

呢個世界有一種惡鬥叫靜雞雞咁鬥, 44歲萬綺蚊同 42歲陳煒,一樣亞姐出身(陳煒 96年冠軍、萬綺雯 89年亞軍)、一樣係亞洲電視花旦、一樣過檔大台,唔使鬥出面,不過去到邊都俾人比較,去到邊,只要有蚊蚊,陳煒就只能夠屈居阿二, 17年前《我和殭師有個約會》係咁, 17年後《東坡家事》又係咁。

相反下下去到盡既陳煒, 13年前拍《乘勝追擊》已經瞓身拍輪姦戲被臨記咬唇舔耳,結果蚊蚊一句:「以為係臨記!」嬲到𠵱家!

當年劇照刊登,蚊蚊同記者講自己一定唔拍,「咁核突」!

同劇唔同枱

蚊蚊一入大台又係擔正,陳煒騷價低過亞視時一半,起步 5千一騷拍親閒角,終於有機會同場又係戲份一個天一個地。蚊蚊做女一同歐陽 Bobby係一對,陳煒做女三同諧星泰臣做一對。由亞視年代狙擊到大台,當事人對外梗係例牌否認唔係仇家。實情呢,無錫外景三個月,唔使明眼人都睇到蚊蚊同煒哥就算日日見都冇 friend過,開工 Hi、 Bye以外零溝通,收工晚飯腳例牌都係蚊蚊、 Bobby同監製王心慰三個。其實明明同輩份都當陳煒無到,又唔怪得嘅,據悉大家一樣咁高咁大,蚊蚊 Bobby樣樣靠自己親力親為,煒哥就例牌自僱無錫妹做跟班,自然同其他演員拉開距離。不過擺足巨星款,煒哥又愛煮兩味收買人心,結果成日煲湯請劇組飲。

無錫外景時,陳煒係獨家村,返到香港全劇演員到齊打邊爐,連劇中老公泰臣都有份,又係唔預陳煒。 網上圖片

入大台足足三年冇位上,新劇陳煒同死對頭萬綺雯再遇,唔止冇得做女一,戲份連新人黃心穎都不如。 網上圖片

「咁核突」

話晒斷斷續續做過廿年同事,連出名人緣好嘅萬綺雯都同陳煒唔 friend,原來真係有前傳。陳煒十三年前接拍亞視劇集《乘勝追擊》,為一場輪姦戲被三名臨記舔耳又咬唇,記者循例問到其他亞視女藝員睇法,心直口快蚊蚊一席話令陳煒嬲足 13年:「我都唔認得係佢(陳煒),以為係臨記添!俾我梗係唔制啦,咁核突!」一句「俾我梗係唔制」足以篤正陳煒死穴。為入大台做大茄減騷價,點知落完筆簽約至知唔肯簽約嘅萬綺雯反而得到大台加錢開劇樣樣迎合,外人一句「同人唔同命」講就容易,換着當事人,呢啖氣點哽!

【捧得太遲】

蚊蚊唔肯做自己人,一簽簽七年既陳煒終於得大台重用,連住兩套劇《梟雄》、《東坡家事》見到佢。

三年後又終於第一次擔正同鄭則仕做一對,據悉出年仲會度身訂造主持十三集烹飪節目。網上圖片

第三女主角都有得喺新劇海報同萬綺雯齊名,陳煒出道 19年第一次有得平起平坐。

終於有仇報

去到邊都俾萬綺蚊騎住嘅局面,想不到 19年後人過中年終於有得逆轉。據悉食正大台花旦荒,無得揀之下同陳煒落筆簽下七年長約,今次總算有得被捧,唔止第三女主角都有得喺《東坡家事》海報同萬綺雯平起平坐,新劇《火線下的江湖大佬》首次喺大台擔正,仲真正得到阿姐級看待,獲大台度身訂造烹飪節目拍港版《十二道鋒味》,而真正擔正原因,當然係宿敵萬綺雯又扭計,唔肯簽約做親生女。週一記者致電,陳煒至截稿前未有回覆,都係嘆緊世界嘅萬綺雯至得閒聽電話:「其實我不嬲簽嘅約都係自己有得揀,今次個新約叫做係部頭約,我一月都會開工同郭晉安拍正劇。我同陳煒咁大個邊會嗌交呢?不過大家朋友圈子唔同就係真嘅。佢咁勤力一個演員,嚟緊有咁多機會,我覺得應該嘅!」呢次確係飛雲,機會嚟喇!不過 42歲人至簽長約,等到約滿 50歲都嚟緊,呢個機會對一個花旦嚟講,係唔係嚟得遲咗啲?

【 28/11長腿再現】

閒時湊狗、陪下老公,又學下陶藝,上週六(28日)萬綺雯失驚無神出動扮得靚一靚, 42歲長腿重出江湖。

原來又係《東坡家事》演員約埋齊齊喺將軍澳王浩信家聚會,毫無意外地是次聚會又係冇陳煒份。

唔止事業有差距,陳煒婚姻亦不如萬綺雯如意,蚊蚊日日同陳十三曬幸福,相反陳煒婚後同商人丈夫聚少離多。

網上圖片

過塘全勝軍

唔止萬綺雯去到邊都係女主角,去到邊都有觀眾緣,屈指一算,幾乎全員亞記過塘大軍發展都唔錯,唔止同齡藝人,連上一輩嘅謝雪心同後一輩嘅𡃁妹李綺雯,機會都多過陳煒。

【謝雪心】

就算係 62歲甘草級嘅謝雪心,一入大台機會一樣多過陳煒,次次有劇上話題十足,連拍廣告搵真銀都搶手過煒哥。

【江美儀】

10年加入大台,雖然亞視味重年紀又唔細,一樣得大台厚待。就算未做得女一號,不過個個角色都搶眼,尤其《女人最痛》同《名媛望族》演出最爆。

【陳展鵬】

大台出身、亞視出名,陳展鵬 09年回巢大台後捱唔夠兩年就趕上大台離巢潮,極速上位, 4年內拍咗 17套劇,套套都係第一男主角。

【田蕊妮】

咁多亞記舊將,唔使講發展最好一定係 38歲田蕊妮,過檔大台後反而由配角變擔正, 13年憑《巨輪》攞完雙料視后,今年套《鬼同你 OT》又叫緊糊!

前世有仇

相識 19年,結怨 13年又有幾奇?電視台巴掌咁大嘅地方,培育咗好多男女巨星之餘,亦都培育咗好多宿世恩怨,攞嚟同姨媽姑姐聯絡感情做茶餘飯後話題絕對一流。老老實實,原來男人郁啲結怨四十年,記仇過女人好多。

《蘋果日報》圖片

【鄭少秋 劉松仁】

由 40年前《楚留香》年代,松哥已經被秋官搶盡風頭,想不到 23年前拍《大時代》繼續被丁蟹㩒住嚟砌。年中神劇重播,呢段 40年宿怨舊事重提,原來當年拍《大時代》,秋官接受記者訪問都話拳打劉松仁一幕印象深:「最想一拳打暈佢!」

【謝賢 曾江】

四個小生去旅行,兩個小生大打出手,揭發原來謝賢曾江又係由上世紀粵語片年代已經唔咬弦。謝賢走紅在自視極高、遲出道十年嘅曾江就讀過番書不放對方在眼內,所以 60年代二人同場已經火藥味重。

《蘋果日報》圖片

【張可頤 宣萱】

97年兩大當家花旦合拍《難兄難弟》,短短幾個月搞到水火不容爆發史上最大型花旦級罵戰,宣萱鬧爆張可頤例遲,張可頤又反擊宣萱笑場阻收工,宣傳劇集二人更變小學雞鬥早到,最後要大台高層公然勒令停止罵戰。

《蘋果日報》圖片

【陳法蓉 李麗珍】

01年亞視劇《美麗傳說》一場掌摑戲,李麗珍疑似假戲真做打到陳法蓉面紅紅。九年後陳法蓉喊晒口舊事重提,話當年俾「呢位演員」鬧黐脷根、掌摑又起飛腳。不過事件亦有另一版本,話陳法蓉例牌遲到,珍妹出手幫劇組仝人出氣。

撰文:娛樂組

攝影:攝影組

鍾意就快D Share啦!
Related Posts Plugin for WordPress, Blogger...