37歲羅天池
太太徐曉浟
羅天池雖然娶到個有米老婆徐曉浟，不過成個婚禮使費都係由男方全包，老婆唔使出一分一毫。 網上圖片
真面目
大把貨 飛甩 TVB唔使愁 羅天池富老婆廣西開酒莊
炒大台魷魚嘅「阿登」羅天池，離開後工作有升冇跌，𠵱家仲忙緊為內地劇集《女總裁的貼身高手》開工，角色有發揮，工作仲排到下年 5月，總算有新開始！
事業有起色，羅天池亦娶得嬌妻，早前補擺 27圍喜酒！而且羅天池老婆徐曉浟（音：柔）原來好猛料，喺廣西經營酒莊生意，閒時仲會周圍旅遊享受生活！唔驚俾人講閒話，羅天池話：「做男人自己靠自己，又唔係唔夠食！」老婆聽到實冧爆
《愛．回家》「阿登」羅天池滿約後離開大台，臨走仲暗串大台寧願請外援都唔畀機會訓練班同學仔發揮，自嘲撈足 15年都冇起色，加上結埋婚膊頭重咗，緊係唔再留係大台捱騾仔
「 TVB奀星搵錢唔穩定」
唔聲唔聲，羅天池同大連女友徐曉浟已經註冊 2年，他說：「老婆係老友契妹，識咗覺得幾正，緊係即時捉實，拍拖半年就決定結婚！成個婚禮使咗幾十萬，因為朋友太多都要盡量 cut，最後擺得 27圍都有啲唔好意思！」
娶到有米老婆驚唔驚惹人閒話，他說：「你拉咩嚟講都得㗎做呢行，我哋男人自己靠自己，又唔係唔夠食！如果真係咁有錢，我就住豪宅（老婆有間酒莊？）酒莊係廣西，佢係其中一個老闆，自己有參觀過，嗰度大約有 2千呎。（生意做到好大？）都 ok嘅！我都同佢講過我呢啲 TVB奀星仔，搵錢唔穩定，不過佢都好信我！」問到點過外母嗰關，天池說：「外母好好人，佢都有考慮過戲子會唔會好花心，自己只係真誠對佢好，佢都 feel到，如果吓吓要講錢同家底就冇得講！」
「接 job接到出年」
羅天池仲話事業終於有起色，「𠵱家拍緊套網劇《女總裁的貼身高手》，拍完月尾會開一部港產片，比較重啲嘅角色。暫時手頭上工作都排到下年 4、 5月，嚟緊有一套仲會去希臘拍！（大台有叫過番去？）冇呀！冇呀！呢個時候唔會返去既然出得去闖，乜都試下囉！」
娶個有米老婆好過捱
娶到個有米老婆，閒言閒語預咗要硬食，娛圈中更有唔少例子，男方都係娶到個富太太，身家仲係億億聲㗎！
採訪、撰文：娛樂組
|
鍾意就快D Share啦！
|
|
|
